'Skol di Bario ta mi delaster chèns pa logra algu'

'Skol di Bario ta mi delaster chèns', segun Haydeline Soleana un di e shen hóbennan di entre 16 i 23 aña, ku ta bishitá 'Skol di bario' na Rotterdam. E proyekto di 'Skol di Bario' ta desaroyá mihó kompará ku hóbennan ku ta sigui otro proyekto di edukashon i trabou, segun Ofisina di Planifikashon Sentral.
E proyekto 'Skol di bario' a kuminsá dos aña pasá na Rotterdam i e ta dirihí speshal riba hóbennan ku no a kaba skol i ta desempleá. Nan tin diferente problema manera; problema sosial i finansiero. Kada hóben ku resultá na e skol akí, ta haña guia individual. Loke tambe ta hasi 'Skol di bario speshal ta ku e ta situá mei mei di un bario kaminda e hóbennan ta biba.
Último chèns
Haydeline Soleana tin 21 aña i e tin solamente su diploma di skol básiko. Te ku awor e no tin niun diploma mas. Na e skol di bario Wijkschool-Noord na Rotterdam el a risibí awor algun sertifikado. Haydeline Soleano no a sigui skol pa motibu di influensha di mucha hòmber i debe ku e tabatin. "Mi pasado no ta niun tiki bunita. Nada ku mi tabata hasi mi no tabata kaba. Mi ta keda un skol 4 luna i despues mi ta bai laga nan." El a bandoná e skol di bario kaba pa varios luna. Pero tòg e ta konsiente awor e mester perseverá. "Mi ta bai hasi algun tèst pa nan wak ku ta por mes mi no por."
Guia individual
E dos skolnan di bario na Rotterdam ta forma parti di un prùf di dos aña. E proyekto ta asina eksitoso ku lo lanta mas skol di bario na Rotterdam. E eksito di e skol di bario ta sinta den e guia individual amplio ku ta duna e hóbennan, segun Manoeska Hennep un di e coachnan na Wijkschool-Noord. "Nos ta bai buska nan na kas. Nos ta te asta bèl un anochi promé, pa rekordá nan presentá na skol e dia siguiente."
Hennep ta splika mas aleu ku e hóbennan ta haña yudansa tambe pa siña kon pa anda ku e diferente problemanan ku nan tin. "Nan ta haña un bista di nan situashon personal. E skol di bario aki ta netamente un lugá pa soru ku nan por bai dilanti den futuro."