Boletin di 7 di mei

Seis kandidato pa lider di partido CDA.Partido CDA a anunsiá nòmber di e seis kandidatonan pa kabes di lista. Ta trata di e polítikonan nashonalmente konosi van Haersma Buma, Spies, Bleker i Van Toorenburg i dos asina yamá outsider: Wintels i Keijzer. Despues di kòmbersashonnan ku 12 kandidato un komishon a hasi un eskoho pa seis kandidato a base di un profil stipulá. E partido no ta publika nòmber di e otro seis kandidatonan ku a kai afó. Pa di promé miembronan di CDA mes por skohe kabes di partido pa e próksimo elekshon dia 6 di sèptèmber.

Renobashon di servisio di seguridat di Kòrsou
Eks promé minister di Antia Maria Liberia-Peters ta enkabesá e komishon ku mester giya e proseso di renobashon di e servisio di seguridat di Kòrsou. Asina gobièrnu di Kòrsou a anunsiá. E proseso di renobashon ta tuma luga ku sosten di AIVD, e servisio di seguridat hulandes. Djabièrnè k'a pasa a manda kasi tur trahado di e servisio di seguridat di Kòrsou kas. Segun promé minister Schotte for di un investigashon a sali na kla ku algun miembro di personal a purba na tumba gobièrnu. No mas ku algun siman pasá  Liberia-Peters a ekspresá su mes kontra di gobièrnu di Kòrsou durante un demonstrashon.

Indemnisashon i diskulpa
Dies pariente di defuntu maskulino di sùit Sulawesi ke indemnisashon di daño i diskulpa di estado hulandes. Nan a mira kon militarnan hulandes a mata nan kasa i tata na 1946. Segun abogado Zegveld loke e viuda i yunan indones ke prinsipalmente ta rekonosimentu di nan sufrimentu. Algun tempu pasa Hulanda a pidi despensa na pariente di defuntu na Rawagadee na Java i a duna nan tambe un indemnisashon di daño.

Merkel ta atvertí paisnan oropeo
Alemania ta atvertí paisnan oropeo pa nan keda mantené nan mes na e palabrashonnan presupuestario inkluso e norma di tres porshento pa defisit riba presupuesto. Estímulo pa ekonomia no tin mag di kondusí na defisitnan mas haltu, asina kansiyer Merkel a bisa. E ta bogá pa reformashonnan struktural pa pone kaha na òrdu. Ayera Fransia a skohé e sosialista Hollande komo presidente nobo. E ta rekonosé ku mester ekonomísá, pero e ke invertí tambe pa laga ekonomia krese. Merkel a referí tambe na e resultado di elekshon na Gresia. El a bisa ku griegonan mester haña tempu awor promé pa forma un koalishon pero Atenas tambe mester tene su mes na e palabrashonnan. Gobièrnu di Gresia a pèrdè su mayoria den parlamentu. E koalishon di Demokrasia Nobo i PASOK ke investigá awor si nan por haña un otro partner di koalishon pa nan por yega na un mayoria pa forma un gobièrnu di unidat nashonal.

Poetin atrobe presidente di Rusia
Na Mosku presidente Poetin a huramentá pa un di tres término. Na Kremlin kabes di Iglesia Ortodòks Ruso a bendishoná Poetin i despues el a huramentá. Poetin tabata presidente kaba di 2000 pa 2008. Pero komo ku ta prohibí pa sirbí tres término tras di otro, su aliadó Medvedev tabata presidente último kuater aña. Durante e seremonia Poetin a tene un duskurso kòrtiku den kual el a bisa ku e ta biba pa sirbi Rusia i pueblo ruso. Si Poetin sinta e término di seis aña e lo bira e lider ruso ku a sinta mas tantu despues di Stalin.

Israèl tambe ta bai urna
Mas notisia tokante elekshon. Na Israèl nan ta spera elekshon na sèptèmber awor. Promé minister Netanyahu a proponé 4 di sèptèmber. E elekshonnan tabata planiá pa otro aña pero pa motibu di tenshonnan den aktual koalishon a adelantá e elekshonnan. Loke tambe ta hunga un ròl importante ta e bon pronóstikonan pa Likud. E partido tin un bentaha riba partido Laboral i partido Kadima. E chèns ku Netanyahu ta bolbe bira promé minister ta hopi grandi.

Biden pro matrimonio di mes sekso
Vise presidente merikano Joe Biden a ekspresá su mes pro matrimonio homoseksual. Durante un entrevista na televishon el a bisa ku durante e di dos término di presidente Obama matrimonio entre hende di mesun sekso mester bira realidat. E ta partidario di esaki, pero el a enfatisá ku ta e presidente ta stipulá e maneho. Ta parse ku e punto di bista di Biden ta diferenshá for di esun di presidente Obama. Obama ta partidario di registrashon di pareha di mesun sekso pero nunka e no a bisa abiertamente ku e ta pro matrimonio homoseksual. E tópiko aki ta un poko sensitivo, speshalmente pa hende ku no sa ahinda pa kua partido nan tin ku skohe.

Lider al-Qaida morto
Na Jemen nan a mata un lider importante di al-Qaida. Esaki a sosodé ku un drone merikano, un avion sin tripulante. E movimentu terorista a konfirmá morto di e lider den medionan di komunikashon. Anteriormente a kondená e lider di al-Qaida pa un atentadó di bòm na 2000 riba un barku di marina merikano. Diesshete merikano a muri den e atentadó.

Pim Fortuyn konmemorá
Na Rotterdam nan a tene ayera'nochi seis minüt pasa di seis dos minüt di silensio pa konmemorá Pim Fortuyn. Eksaktamente dies aña pasa Volkert van der G. a asesiná Fortuyn na Hilversum. Ayera tambe a desvelá e nómber nobo di un plenchi den Korte Hoogstraat den sentro di Rotterdam. E plenchi yama awor Pim Fortuynplaats. Mas o menos mil persona tabata presente na e seremonia aki.

Feyenoord den Champions League
Na stadion de Kuip na Rotterdam un 30 mil fanátiko di Feyenoord a selebrá ayera'nochi ku e klup a sali di dos den divishon di onor. Banda di mitar di ocho e bus di e hungadonan a yega e stadion. Un tres mil fanátiko tabata warda e futbolistanan pafó di de Kuip. Ku e di dos luga den divishon di onor Feyenoord a klasifiká pa e tanda preliminar di Champions League.

Pronóstiko di tempu na Hulanda:
Periodo di solo pero tambe fèltnan di nubia riba otro. Temperatura 13 pa 16 grado. Mayan ta hopi nublá i den e parti wèst áwaseru ta kai debesenkuando.