Boletin di notisia di 16 di mei
Kaso kontra Mladic ta kuminsá na Den Haag
Awe e kaso kontra Ratko Mladic ta kuminsá na Den Haag. Mladic ta èks general di Bosnia i Servia. Ta akus'é di genosidio, krímen kontra humanidat i di a komete diferente krímen den tempu di guera. Na promé luga fiskal a tene su diskurso di defensa. Nan a yama mas ku 400 testigu pa testigua durante e proseso. 158 lo konta nan historia den sala di korte. Un di e testigunan ta un franko tiradó ku a efektua algun enkargo pa Mladic entre 1992 i 1995. E ta'tin ku tira riba manifestantenan. Hues a para e proseso awemèrdia. Lo sigui ku e proseso mañan mainta na Den Haag.
Elekshon nobo na Gresia ta tuma lugá riba 17 di yüni
E elekshon nobo na Gresia lo tuma lugá riba 17 di yüni. Na e momentunan aki e gobièrnu interino ta preparando e elekshonnan bou di guia di presidente Panagiotis Pikramenos. E ta presidente di korte supremo na Gresia. Presidente Papoulias i lidernan di e otro partidonan a palabrá ku e gobièrnu interino lo no tuma ningun desishon ku lo tin konsekuensianan internashonal, asina e lider di partido komunista a deklará.
Akuerdo di sinku partido ta konkretisá
Minister De Jager i frakshonnan di VVD, CDA, D66, Groenlinks i ChristenUnie a yega na un akuerdo pa sera presupuesto na Den Haag. Tur partido ta partisipá di ta orguyoso ku e logro. Ahinda no a duna detaye di e kombenio pero ya ta konosí ku kontribushon propio di gastu di kuido lo subi di 220 pa 350 euro pa aña. Minister De Jager a deklará ku tur partido por mira nan logro den e akuerdo. Awe Ofisina Sentral di Plánifikashon lo trata e akuerdo i hasi kalkulashonnan. Den e akuerdo a palabrá pa bini di ku medida di ousteridat pa baha gastu ku 12 miar di euro. Ku esei ke logra baha défisit di presupuesto di 2013 ku 3 porshento.
Atentado riba èsk minister na Colombia
Un atentado na kapital di Colombia, Bogota a kosta bida di 2 persona. 20 habitante a keda heridá. E atentado lo tabata dirigí riba èks minister di asuntunan interior, Londono. El a keda heridá pero no ta den peliger. Tempu ku e tabata mandatario e tabata lucha kontra e moveshon di rebeldenan, FARC.
PostNL ta kita partidó di karta
Kompania di koreo, PostNL a kita un partidó di karta for di trabou. E lo a pèrdè mas ku mil karta. Kartanan ku ta'tin ku parti na Leek ku ta keda na Groningen. Habitantenan di e pueblo a tuma kontakto ku e kompania na momentu ku nan a risibi nan koreo. E partidó di karta a bisa ku el a laga e pakete na e sentro di distribushon. Pero no por a haña e kartanan niun kaminda. Awor PostNL ta investigando si e muhé a hòrta e kartanan.
Eskritor Carlos Fuentes a fayesé na Mèxico
Eskritor mehikano Carlos Fuentes a fayesé den un hòspital na Mèxico-stad na edat di 83 aña. Fuentes ta un di e representantenan di mas importante di literatura latino amerikano. Presidente Calderón a partisipá su fayesemente riba Twitter. El a deskribí Fuentes komo un mehikano universal. E fayesido eskritor a skibi mas ku 20 novela, entre nan "E morto di Artemio Cruz" i "E kabes di Hydra". El a gana e premio Cervantes na 1987, premio literario di mas importante den area di habla spaño. Tur su bukinan ta tradusí na hulandes.
George W. Bush ta sostené Mitt Romney
Eks presidente George W. Bush ta sostené e kandidato republikano presidensial Mitt Romney. Un reportero di kanal di televishon merikano ABC News a logra haña e deklarashon ei di Bush djis promé ku el a drenta lift i e portanan a sera. No ta masha kontentu ku Bush su sosten. For di un sondeo a sali ku hopi merikano ta haña ku Bush ta responsabel pa deterioro di e ekonomia merikano.
Hopi interes pa bono di Facebook promé ku e subi merkado di bolsa na Wallstreet
Facebook ta bendiendo mas bono di e kompania ku a plania. Agensia di Prensa Reuters a partisipá ku ta hisa kantidat di bono ku un kuart. Esei ta pone e montante ku Facebook ta spera di gana ku su subimentu di merkado di bolsa subi bira 15 miar di dolar. Un bono ta kosta entre 34 pa 38 dolar. Mas ku 900 mion persona ta uza Facebook. Ta e reda soshal di mas grandi na mundu. Djabièrnè e kompania ta subi merkado di bono.
Djamanta di mas karu di mundu
Ayera un mionario a paga 10 mion di dolar pa un djamanta na Ginebra. Ta trata di e djamanta Beau Sancy ku tin forma di un pera. Pa mas ku 4 siglo e piedra balioso aki tabata poseshon di famianan real na Oropa. Prínsipe prusiano George Friedrich a ofrese kas di findishi Sotheby's pa pone e djamanta na benta. Friedrich tin mester di sèn. Pa años e stenchi tabata den posishon di famia real prusiano i famia di emperador. Promé ku esei e djamanta tabata den man di famia Oraño pa tres generashon.
Urby Emanuelson no ta den selekshon hulandes
Urby Emanuelson no ta forma parti di e selekshon di Oraño ku ta bai partisipá na Kopa Oropeo. E kampionato ta bai tuma lugá na Polonia i Oekraina. Coach di e selekshon, Bert van Marwijk, a baha kantidat di su hungadónan. Awor e selekshon ta konsistí di 27 futbolista. Wijnaldum, hungadó di PSV; De Vrij di Feyenoord i Maduro defensor di Valencia no ta forma parti di e selekson i tin ku bai kas bèk. Dia 29 di mei lo partisipá na UEFA, ku kua hungadónan selekshon Oraño ta partisipá na Kopa Oropeo.
Wer na Hulanda:
Bientu ta supla fuerte, temperatura ta 11 grado. Mañan, dia di Asension, ta seku i solo ta bria. Temperatura máksimo ta 15 grado.