Kòrsou a pèrdè un yu i a haña un héroe aseka

Mas o ménos 400 hende a asistí djadumingu na e konmemorashon di Ramsis Kwidama i e entiero despues na santana di Soto. Pa hopi bishitante e enkuentro tabata un kombinashon di emoshon i orguyo: “Nos a pèrdè un Yu di Kòrsou, pero nos a haña un héroe aseka.”
Ramsis Kwidama a hoga djaweps 24 di mei den Nieuwe Maas na Rotterdam ora ku e kera salba un mucha hòmber di 12 aña for di awa. Kuater dia despues brantwer a haña su kurpa sin bida.
Kaha será
Durante di e seremonia na e kas mortuario na Willemstad e kaha ta será. “I e lo keda será”, Rutger Merien, primu di Ramsis ta bisa. E ta enkargá ku  organisashon di e seremonianan. “Pa kousa di e aksidente trágiko Ramsis su kurpa a keda seriamente mutilá. Na yegada na Kòrsou – djaweps pasá – nos no por a rekonos’é mas.
E santo sakrifisio di misa, na misa di Soto, tampoko no ta sigui. “GGD no ta pèrmití pa pone e kaha den misa sin refrigerashon. Ku nos temperaturanan i e estado di e kurpa, lástimamente no por”, Merien ta bisa.
Ta pesei ta tene e misa den e sala di e kas mortuorio, kaminda si por fria. Aki tin lugá pa solamente 150 hende, ke men ku 200 hende adishonal mester warda pafó. Nan no por tende e pader, pasobra no tin instalashon di zonidu.
Lombrishi
Despues di e misa Ramsis su amigunan ta karga su kaha bai pafó i djei ta sigui un biahe di tres kuart’i ora pa Soto na Band’abou. Soto ta e pueblo kaminda Ramsis su mayornan a nase. “Ei su lombrishi ta derá”, un di su subrinanan ta bisa.
Ounke tristesa ta reina e hendenan di Soto ta orguyoso di e loke ku Ramsis a hasi. “El a duna nos un ehèmpel”, un taksista ta bisa. “Esei nos ta orguyoso di dje, i Hulanda tambe por ta orguyoso di dje.”