Morto den tráfiko riba brùg Juliana

WILLEMSTAD - Un aksidente di tráfiko serio djabièrnè anochi 8 di yüni riba brùg Juliana a kosta bida di Eldrid Bernardo Leonora di 39 aña. E ta e di sinku morto den tráfiko e aña aki.
For di investigashon preliminar di polis a sali ku e víktima tabata kore riba brùg Juliana den direkshon di Otrobanda, ora ela pèrdè poder riba stür i a dal den e barera di seguridat.
Rond di 20.43 or polis a haña un aviso i a manda un patruya pa brùg Juliana, kaminda e aksidente a tuma lugá. Polis a haña Leonora gravemente heridá, ku su kurpa ta kologá mitar for di e outo. E diferente slanan ku el a haña den e aksidente a kousa diferente herida i el a muri einan mes.
E aksidente a kousa hopi kongestion di tráfiko riba brùg. Ministerio Públiko a tuma e kurpa sin bida pa investigá mas aleu.