Futbòl hubenil na Kòrsou tin difikultat

Siman pasá cvv-Willemstad den e klase bou di 11 aña (U 11) a bira kampion di Kòrsou. Nan a bati Excellence 4 pa nada. Djasabra awó sobrá di e finalnan den tur e otro klasenan di edat ta tuma lugá (U 13 te U 20). Detaye remarkabel: den tur final tin un tim di cvv-Willemstad.
“Ta un resultado masha bunita pa bo tin tur selekshon den final i bon pa e klup su ‘image’tambe”, direktor tékniko di cvv-Willemstad Ronald Añes ta bisa. “Ma bo mester puntra bo mes sí ta kon por ta. Futbòl hubenil na Kòrsou ta for di balans i esaki no ta pone futbòl na Willemstad bira mas mihó.”
Añes no ta un deskonosido den mundu di futbòl. E tin dos aña ta guia mucha hòmber di entre 6 pa 16 aña na su skol di futbòl. Ademas e ta manager tékniko di cvv-Willemstad. Añes tabatin 23 aña komo trainer di futbòl diplomá na Hulanda i a duna ‘clinic’ den diferente pais, entre otro Estádos Unídos i Singapore.
[related-articles]Stanka
Dos aña pasá Añes a kuminsá ku un plan di sinku aña na Willemstad, pero e ta konstatá ku e desaroyo – despues di dos aña – ta bai muchu lihé. E desaroyo tin peliger di stanka segun Añes pasobra e timnan rònt di Willemstad ku por ta bon oponente no a krese huntu. “Otro klup no por desaroya nan timnan mas aleu. I esaki ta un problema: bo mester di otro pa bo bira mihó.”
Willemstad ta gana hopi wega ku skor haltu. “Ta dushi pa gana pero den futbòl hubenil no ta trata di ganamentu. Ta trata di desaroyo di e mucha hòmbernan. Ta kon bo ta bai tene nan skèrpi si tur wega ta kaba ku skor haltu? Nan ta kere ku nan ta bon. Pa trainer tambe esaki ta un problema”, segun Añes.
Solushon
Un solushon no ta fásil Segun e manager di hubentut di Willemstad tin muchu hopi klup na Kòrsou ku muchu poko kader. Ademas e klupnan kasi no tin moda; tin di nan no ta ni kobra kontribushon. Mayoria di e klupnan no tin un maneho hubenil i no por presentá un tim drechi.
Bònt di futbòl FKK lo mester ta e organisashon ku tin ku sigui ku Añes su ideanan. Ma ei tambe tin un problema segun Añes. “Mi no tin bista riba e asuntunan den bònt. Último dos temporada a pasa masha bruá. E eskema di wega no ta konosí te algun dia promé ku wega anto kiko e skor ta, niun hende no sa.”
Kompetishon nobo
Un kompetishon nobo ku ta kombiná e dos regionnan eksistente (Pabou i Pariba) na Kòrsou ta pidi bon organisashon. E kondishonnan manera vèlt i transpòrt mester ta bon.
“Mi ta pro pa hasi e kompetishon mas chikí. Por ehèmpel forma un kompetishon ku kuater òf sinku tim di kada un di e dos regionnan.” E timnan den e klase bou di esaki segun Añes e ora ei por djoin via un sistema di promoshon/degradashon.