Boletin di notisia 25 di yüni 2012

Lugo ta bai Mercosur pa splika su posishon

Fernando Lugo, e presidente destituí di Paraguay, ta bai kumbre di Mercosur otro siman pa splika su posishon. Djabièrnè último parlamentu a bah'é, ya ku e no a hasi lo sufisiente pa pone un fin na e aktonan di violensha relashoná ku invashon di un finka. Aliansa komersial Mercosur a laga su susesor Federico Franco sa, ku e no ta bonbiní n'e kumbre. Na Sur Amérika no ta rekonosé Franco komo presidente di Paraguay.

Petishon ofishal spañó pa sèn oropeo a drenta
Spaña a pidi yudansa finansiero ofishalmente pa bankonan den pèrtá. Resientemente Madrid a anunsiá ku lo e hasi petishon pa risibí sèn di Bruselas, ma e pais a tarda ku realisashon di su propósito. No sa ainda kuantu sèn Spaña ke pa Oropa dun'é. Anteriormente a indagá wak kiko ta kiko anto a resultá ku e bankonan spañó débil mester di no mas ku 62 miar di euro pa sania nan balanse atrobe. Oropa a reservá un montante di 100 miar di euro pa Spaña.

Morto Stephany Flores ta duel Van der Sloot
Joran van der Sloot a skibi mayornan di defuntu Stephany Flores un karta, den kua e ta bisa ku morto dje damita ta duel e. Den un otr'un karta e ta pidi pa baha su kastigu. Abogado di Van der Sloot a partisipá kontenido dje dos kartanan, kaminda Joran ta bolbe atmití di a mata Stephany Flores di 21 aña di edat, ma ku esei no tabata e intenshon, sino mas bien un reakshon emoshonal pasó e tabata fuma. Na Peru ta dikta muchu menos kastigu pa asesinato ku no ta premeditá, esta 3 te 5 aña di prizòn. Aktualmente Van der Sloot ta sintando un kastigu di 28 aña di sèl akusá di asesinato.

Schippers mal fadá ku tarifa pika di dentista
Minister Schippers no ta kontentu ku e eksperimento di outodeterminashon di tarifa di dentista. Prèisnan a subi asina tantu ku e mandatario di Salubridat Públiko tin pensá di para e eksperimento. Un investigashon ta demostrá ku e tarifanan dje promé kuartal dje aña akí a subi ku 10 porshento. Minister Schippers a spera yùist ku prèis lo baha i ku e pashèntnan lo haña mas libertat di opshon. Si fin dje aña akí e tarifanan no baha n'un nivel 'aseptabel', e minister lo pone un fin n'e eksperimento, ku ta supos di a dura tres aña.

Desertá ehérsito a bira kos di tur dia na Siria
Mas ku 30 militar di ehérsito sirio a hui bai Turkia. Prensa turko ta informá ku entre e militarnan desertá tin un general i vários altoofishal. Último lunanan miles di militar a bandoná ehérsito sirio, mayoria a pasa pa e insurgentenan pa djòin nan. Masha poko sa sosodé ku altofunshonarionan tambe ta desertá. Supuestamente e 33 militarnan a krusa frontera ku nan famia. Entretantu Turkia ta menasá di tuma medida severo kontra pais bisiña Siria, ku a basha un djèt di kombate turko abou. E minister di Asuntunan Eksterior a anunsiá ku Turkia lo hasi 'tur lo nesesario resueltamente i sin wak patras. Kiko gobièrnu turko na Ankara tin pensá na hasi presisamente lo e anunsiá mañan, ora ku e 28 paisnan miembro di OTAN reuní pa deliberá ku otro. E avion di kombate turko tabata bulando den espasio aéreo internashonal, segun e minister turko. El a penetrá aksidentalmente den esun sirio, ma el a sali bèk dia bieu ora ku a bash'é abou.

Pabien rònt mundu pa presidente Mursi di Egipto
Sekretario general di Nashonnan Uní, Ban Ki-moon a duna Mohammed Morsi, presidente nobo di Egipto pabien ku su viktoria. Ban ta elogiá e egipsionan, ya ku e promé elekshon liber n'e pais a bai djun forma pasífiko. Presidente Obama a yama Morsi na telefòn i a bis'é ku Estados Unidos ke yuda Egipto p'e transishon pa demokrasia bai bon. Minister Rosenthal a felisitá Morsi ku su triunfo na nòmber di Reino hulandes. Rosenthal a bisa ku lo e husga e presidente egipsio a base di su aktonan. Ayera a proklamá Mohammed Mursi, miembro dje kofradía musulman konservativo 'é ganador di elekshon presidenshal na Egipto. Den e di dos tanda, Morsi a risibí 51.7 porshento dje votonan, siguí pa su kontrinkante Shafiq ku 48.3 porshento. Públiko a grita di alegria na Plasa Tahrir na kapital Caïro. E ambiente festivo tabatin di aber sobretodo ku derota di Shafiq, ku tabata e último minister presidènt den gobièrnu di èks presidente Mubarak. Tabata konsider'é komo kandidato dje hunta militar ku ta gobernando Egipto temporalmente.

Defensa no ke sa nada djun amtenar reveladó
Ministerio di Defensa hulandes a pone un reveladó un banda. Ta trata djun ámtenar ku a komprobá ku band'i 40 kolaboradó dje ministerio ta traha den eksterior sin un deklarashon di seguridat na drechi. Un deklarashon asina ta nesesario pa traha ku entre otro dokumentonan konfidenshal di Defensa. P'e motibu akí e hendenan aki ta forma un riesgo di seguridat potenshal. Notisiero NOS tin e lista ku tur nòmber i puesto den su poder. Defensa ta konsderá e kos komo un asuntu atministrativo.

Mas i mió poder polítiko pa Bruselas na Oropa
Wolfgang Schäuble, minister di Finansa di Alemania, ke ekstendé poder polítiko di Bruselas konsiderablemente. Paisnan miembro mester entregá poder polítiko riba terenunan importante, asina el a deklará den entrevista ku e revista aleman Der Spiegel. Komishon oropeo mester bira un gobièrnu oropeo di bèrdat, kaminda ku siudadanonan oropeo mester por elig''i e presidente direktamente, segun Schäuble. Na pareser dje minister aleman di Finansa mester fortalesé papel di parlamentu oropeo.

Bùs ku mucha i iskierdista a kai den abismo
Un desgrasi'i bùs na Méhiko a eksigí bida di por lo ménos 26 persona, entre nan seis mucha. Desenas di hende lo ta heridá, shete ta den kondishon grave. E bùs a kita for di kaminda den e parti zùit dje pais i a kai den un abismo k'un profundidat di 300 meter. Awa tabata kayendo masha duru mes. Simpatisantenan di PT, partido di obrero iskierdista na Méhiko tambe a peresé. Djadumingu awor tin elekshon presidenshal na Méhiko.

Ekstradishon èks promé minister Mahmoudi pa Libia
Tunesia a ekstraditá èks promé minister Mahmoudi di Libia. E pais a pidi pa ekstradit'é, komo ku e ta responsabel pa krimennan kometé durante régimen di defuntu koronel Gadafi na Libia. Abogadonan dje èks promé minister, presidente di Tunesia i gruponan pa derechi di hende a oponé su ekstradishon, ya ku nan ta teme ku lo no duna Mahmoudi un proseso hustu i ku kisas lo tortur'é òf mat'é.

Tortuga sentenario na Galapagos a bai sosegá
Lonesome George, e tortuga famoso na islanan Galapagos a fayesé. Tan leu ku ta konosí e tabata e último ehemplar bibiente djun suptipo di tortuga gigante di Galapagos. Un bosero di Galapagos National Park ta bisa ku George tabatin mas o ménos shen aña di edat. Ayeramainta su kuidadó a bai hañ'é morto. Di kiko el a muri no ta konosí ainda. For di 1972 e tortuga tabat'un atrakshon públiko n'e archipiélago. Biólogonan a trata di gana Lonesome George asina leu p'e prokreá pa nan por studia su desendientenan, pero nada. Gerentenan dje parke ke yena su kadaver i prepar'é pa uz'é pa ekshibishon.

Deporte-futbòl pa Kampeonato Kopa Oropa
Italia a klasifiká pa semifinal di Kampeonato di Futbòl pa Kopa Oropa. Selekshon italianu a derotá esun ingles ku penalti. E ekiponan no a skor nada, ni durante partido, ni ora a prolong'é. Djaweps awor Italia lo enfrentá Alemania den semifinal. E otr'un wega lo bai ta entre Portugal i Spaña.

Wer na Hulanda
Variablemente nublá, sobretodo n'e region nortost dje pais tin algun yobid'i awa. Temperatura ta alrededor di 17 grado. Mañan sí ta seku i temperatura ta subi bira 20 grado.