Ta sigui basha restu di demolishon na Plasticbaai

No a limpia e bashamentu ilegal di restu di demolishon pisa ku tabatin na Plasticbaai banda di San Pedro riba 19 di yüni, no opstante òrdu di departamentu di medio ambiente di SKS. E kompania di basha restu di demolishon responsabel na lugá di limpia, ilegalmente a basha 66 trùk di restu di demolishon mas aseka.
Ta trata di baranka grandi di beton ku heru ku ta bini di e mulinanan di bientu ku a bash’abou na Tera Kòrá. E restunan di beton ta kore un distansha di sigur shen meter. Esaki ta dos be mas tantu ku e 24 karganan di trùk yen ku a basha kaba. SKS mes ta bisa ku nan ta mará na man i pia pasobra segun e servisio no tin legislashon ku por laga nan intervení mes ora.
No tin legislashon
“Ántes nos tabatin e Lei di Promoshon Orden General i Protekshon di Komunidat. For di 10 di òktober 2010 esaki no ta na vigor mas i nos no por aktuá direktamente. Na luga di esaki nos mester ta kreativo i usa otro lei pa trata ku e violadónan di lei aki”, hefe suplente di e Servisio Cornelis Jansen ta splika.
“Pa loke ta e bashamentu di restu di demolishon ilegal na Plasticbaat nos ta investigando si tin material peligroso envolví ku por ta un peliger pa salubridat públiko òf seguridat. Si t’asina nos por basa nos mes riba un lei ku ta prohibí esaki.”
Responsabilidat
Ademas SKS ta bisa ku nan tin problema ku e deklarashon di e kompania ku ta basha e restunan di demolishon, ku ta bisa ku ta na petishon di e doño di e tereno nan a basha e restunan ei pa krea un ‘muraya’pa kontené baka ku ta kana lòs.
“Entre tantu nos sa ku e tereno ta propiedat privá. Pero esaki no ta hasi bashamentu di restu di demolishon legal ainda. Pa loke ta e responsabilidat nos mester investigá si ta di bèrdè e doño di e tereno a kumpra e restunan di demolishon seka e kompania i si el a duna òrdu pa bashé riba su tereno”, segun Jansen.
[related-articles]