Skarsedat grave di koriente na Kòrsou

“Nada serio no mester pasa ku por pone preshon èkstra riba e ret di koriente di Kòrsou, pasobra e ora ei e isla tin un problema serio.” Esaki ta e aviso ku direktor di Aqualectra Darick Jonis a duna durante un konferensha di prensa riba djarason 25 di yüli.
For di kuminsamentu di e siman aki e kompania di energia ta lucha ku un falta serio di kapasidat pasobra kuater mashin a kai afó i e sentral di BOO no ta funshoná bon. P’esei Aqualectra a disidí pa e dianan binidero kita koriente den un di e barionan riba e isla kada kuater ora.
Rashon di koriente
“Aktualmente e kapasidat ta alrededor di 70 porshento”, segun Jonis. “Ku e situashon aki nos no por pèrmití pèrdida èkstra. P’esei nos ta hasi un petishon urgente na tur yu di Kòrsou pa no dispidí koriente.” Un total di 28 bario djarason meinta a sinti e interupshon di koriente, variando di 2 te kuater ora. “E dianan binidero lo no ta diferente”, bosero di Aqualectra Sharo Bikker ta bisa.
Mashin dañá
Aqualectra ta bisa ku basta tempu nan tin ta lucha ku eskasés di mashin komo ku for di djasabra mester a saka un mashin na Mundo Nobo for di servisio pa reparashon urgente. “Konta seka esaki ku Aqualectra na Dokweg tambe tabatin dos mashin ta drecha i ku awe meinta mitar di diesun un di kuater mashin di 21 MW a kai afó i bo por bisa ku ta trata di un situashon sumamente difísil”, segun Bikker.
Tékniko di Aqualectra ta kulpa e defektonan na ‘behes’ i ‘problema di mantenshon’. Segun Jonis e reparashonnan lo tuma un siman si no ta mas.