Trinta aña Matthäus-Passion na Kòrsou

“Despensá mi, esaki no ta zona bon. Mester ta hopi ménos duru!” Dirigente Frank Francisca ta trata di keda amabel pero na tur kos por ripará masha bon ku e presentashon di e di trinta Matthäus-Passion ta yegando hopi serka. E tokadó di klarinet ta protestá un tiki, ma e no ta haña chèns. Francisca tin e kos bon den man.
E koro di Bach di Kòrsou Bièrnè Santu ta presentá un parti di Matthäus-Passion di Johann Sebastian Bach na misa di Brievengat. Frank Francisca na un manera musikal ta hiba públiko riba e kaminda di krus di Hesu Kristu i e historia di Resurekshon.
Trinta aña
Frank ta baké. Eksaktamente trinta aña pasa, den misa di Pietermaai, el a dirigí su promé ‘Matthäus’. Francisca: “Defuntu pader Pim Janssen tabata gusta toka òrgel i tabata haña e kaminda di krus tradishonal i tur e resamentu den misa riba Bièrnè Santu poko laf. E tabata ke muzik, pero e no por a toka i dirigí pareu, ke men el a pidi mi. Esaki tabata na 1982. E tempu ei nos tabata presentá Matthäus solamente ku òrgel i kor.”
Fransisca ya tabatin 20 aña ta dirigí ku alma i kurpa. Rònt di kambio di siglo su Matthäus mester a muda bai misa di Brievengat. “E pastor nobo no ker a koperá, e no ker a tende nada di Bach den su misa. Nos pastor anterior a muda bai Brievengat i nos a muda huntu kuné ku henter e kor i orkesta.
Kaminda di krus musikal
Sigur 650 hende awe lo presensiá Matthäus-Passion. Ku esaki e misa lo keda yen yen, segun Francisca. “I ta hende di tur gremio di pueblo. Nan ta preferá e kaminda di krus musikal.”
Pero e kaminda di krus lo no dura tres ora, pasobra e koro di Bach ta kanta i toka un selekshon di Passion. “Esaki lo dura mas o menos un ora i kuartu”, segun Francisca.
Solista sopran
E ensayo di djaweps ta èkstra, pasobra e solista sopran pa e di trinta edishon aki a kaba di yega for di Hulanda i a pèrdè e ensayo general di djamars. Myrtle Treurniet ta un kantante profeshonal kurasoleño, ku ta biba i traha na Hulanda.
E tin pasenshi ku Fransicisca i e músikonan ku ta akompañ’é. Na momentu ku e kuminsa kanta “Blute Nur, du liebes Herz”, tur hende ta komprondé pakiko: e tin un bos sopran magnífiko. E orkesta i koro di Bach, tur ta amante, awe nochi lo tuma un kabe’i boto riba e bos aki.