Diploma HAVO/VWO Boneiru bou di nivel

E prestashonnan di siñamentu na Scholengemeenschap Bonaire no ta sufisiente i ta keda bou di nivel di grupo di alumno igual na Hulanda oropeo. Esaki ta konta pa tur departamentu di e skol: vmbo, klasnan abou di Junior College i departamentu Havo/Vwo.
Esaki ta pará den un rapòrt di Inspekshon di Enseñansa. Nan a hasi investigashon di kalidat na tur skol na Hulanda karibense, entre nan Scholengemeenschap Bonaire.
Keda sinta
Kompará ku Hulanda oropeo muchu alumno ta keda sinta den havo 3 i 4. Tambe tin muchu hopi alumno ta kai bèk di havo 4 pa vmbo-tl i di vwo 5 pa havo. Na 2011 pa eksamen final di havo i vwo respektivamente 55% i 58% di e alumnonan a slag. Ku esaki e porsentahe di slag ta keda hopi atras seka esun di Hulanda oropeo.
Ademas e porsentahe di slag ta muchu influenshá pa e diferensha grandi entre e promedio di punto pa èksamen di skol i e punto di èksamen final general. Asina tin e riesgo ku un kantidat di alumno ta haña un diploma mientras ku nan no ta kumpli ku eksigenshanan di e èksamen final general.
Vmbo i Junior College
Tantu e departamento vmbo práktiko i e departamentu di klas mas abou, Junior College di Scholengemeenschap Bonaire tin diferente problema ku ta stroba desaroyo di enseñansa.
Ta trata aki di presensia di bon material pa práktika, material ku ta kuadra ku e mundu di e muchanan i e loke nan sa kaba, i falta di sufisiente computer ku internet. Tambe e deskaida di e edifisio i e falta di airco den e klasnan ta faktor ku no ta promové siñamentu na tur dos skol.
Pa falta di bon materal e dosentenan mes ta desaroyá e materia. Nan ta usa lès ku por haña riba internet. No tin un relashon ku e metanan klave di formashon básiko i no tin èksamen final, loke ta pone ku no por garantisá kalidat den e oferta di materia na e skol.
Na tur departamentu e prestashon di siñamentu ta keda atras seka mesun grupo di alumno na Hulanda oropeo. Den e di tres aña e nivel ta subi algu pero no sufisiente. E alumnonan ta keda ku un retraso di un aña pa un ana i mei.
[related-articles]Lès no ta sigui
E enseñansa di havo i vwo ta den desaroyo. E aña aki e departamentonan aki ta keda den edifisio nobo mas agradabel pa e alumnonan i ei dosentenan ta duna lès ku método nobo. Algun previshon no ta funshoná ainda, manera e nètwèrk di ict i e sentro di dokumentashon. Inspekshon ta mira problema ainda sí den área di tempu di enseñansa, kuido, guia i maneho i di maneho di kalidat.
Hopi lès no ta sigui pasobra dosente ta malu i tin falta di personal pa remplasá. E skol no ta antisipá sufisientemente riba esaki, segun Inspekshon.
Konklushon i palabrashon
Ku tur departamentu di SGB a palabra medida pa mehorá e situashon i a fiha e palabrashonnan aki den un plan di supervishon. Eiden tin para ki dia e kalidat mester ta na òrdu atrobe i kon por konstatá esaki. Tambe tur skol mester manda un plan di skol bálido i aktual pa Inspekshon, kaminda ta deskribí e maneho relashoná ku kalidat di enseñansa.
Ta e promé investigashon di kalidat for di dia ku e skolnan den Hulanda karibense a kai bou di supervishon di Inspekshon di Enseñansa. Den un periodo di sinku aña (2011-2016) inspekshon ta evaluá tur skol anualmente i ta sigui e aktividatnan di mehorashon rigurosamente. Pa mas tardá na 2016 e skolnan mester kumpli ku tu aspekto di e kalidat básiko.
---------------------------

• Scholengemeenschap Bonaire -Junior College (Pdf, 57kB)
• Scholengemeenschap Bonaire - vmbo, praktijkonderwijs (Pdf, 57kB)
• Scholengemeenschap Bonaire - havo-vwo (Pdf, 54kB)