Elekshon hulandes muchu karu pa BES

Habitantenan di Hulanda karibense no tin tinu ainda pa elekshonnan binidero pa parlamento hulandes. Ta promé be ku nan por partisipá: Boneiru, Saba i Sint Eustatius awor ta forma parti di sistema gubernamental hulandes.
E tres gezaghèbernan di e islanan ta realisá ku tin trabou ta bini, pero nan no tin un idea kon elekshon hulandes ta bai. Pa gezaghèber Lydia Emerenciana na Boneiru asta ta promé elekshon ku e tin ku organisá. Ta dos luna pasá el a bira gezaghèber.
“Mi tin ku orientá, pasobra meskos ku pueblo, nos no a tene kuenta ku e senario aki”, segun Emerenciana. Gezaghèbernan Jonathan Johnston di Saba i Gerard Berkel di Sint Eustatius no a tende nada ainda, pero nan ta ferwagt ku huntu ku e tim ku ta enkargá ku elekshonnan lokal nan mester por bini kla.
Gastu
“Mi ta mas prekupá pa e gastunan di un elekshon èkstra”, segun Berkel. “Nos no tin esaki den presupuesto i mi por imaginá mi ku diputado di Finansa ta puntra su mes ta ken ta bai paga esaki.”
Si e elekshonnan ta bai forma parti di bida diario di pueblo niun di e gezaghèbernan no por bisa. Segun Emerencia kaida di gabinete hulandes tin efekto sí na Boneiru, pero e desafionan di tur dia riba e isla ta pidi mas atenshon. E distanshanan ta grandi i e laso entre Hulanda i Boneiru, na tur dos banda, no t’ei ainda.
Kampaña
E islanan ta realisá ku e 16 mil hende ku derechi di vota ku nan tin konhuntamente, nan ta leu for di alkansá kiesdeler. Ta ken sa si partidonan polítiko òf polítiko individual lo bin hiba kampaña riba e islanan di Hulanda karibense.
Polítikonan ku a kue fama ta Alexander Pechtold di D66 i Cynthia Ortega-Martijn di ChristenUnie. Bekel: “Asta si e dosnan aki no hiba kampaña, na lo haña voto pasobra den pasado nan a mustra ku nan ke atendé ku interesnan di e islanan.”
Deseo komun
Berkel ta rekonosé ku un representashon polítiko na Den Haag, ku e kantidat di hende ku aktualmente tin derecho di vota, ta un problema, pero ku riba nivel di gobièrnu mester haña un solushon. “Pa por tin influensha kisas ta posibel pa pone un representashon propio di islanan BES na Den Haag. Mi no sa si esaki ta alkansabel, pero ta nos deseo komun si”, segun Berkel.