Shirma Rouse ku homenahe na Aretha Franklin

Soño di Shirma Rouse porfin a bira realidat ku produkshon di 'Tribute to Aretha Franklin'. Un aña largu e kantante antiano, desendiente di Sint Eustatius, a studia delaster un detaye di 'The Queen of Soul', ku semper el a atmirá. Amigunan di Shirma Rouse, ku tambe ta músiko, a kontribuí gratuitamente ku produkshon dje homenahe musikal.
Laga nos ban bèk den pasado, konkretamente 1968, e aña ku Aretha Franklin a kanta den Amsterdam Concertgebouw yen yen di hende, despues di a presentá e mes dia den De Doelen na Rotterdam: tabata su promé i alabes último gira internashonal, debí na su temor pa subi avion. Un presentashon ku práktikamente tur hende a lubidá, te dia ku Hans Mantel (produktor di televishon) a reskatá e imágennan, drecha nan i pone nan riba un DVD, ku porsierto a gana Edison Award na 2011.
Konhunto musikal
Direktor musikal di Metropole orkest ta duna Shirma Rouse, amante fe su infansia di músika dje reina di soul, e mes DVD akí. Shirma a studia i ensayá presentashon di Aretha Franklin, ku e intenshon di graba un produkshon titulá 'Tribute to Aretha Franklin'. Tur e studiamentu i seshon di ensayo no tabata enbano. Porfin su proyekto a kue forma ku yudansa di 14 músiko, amigu di Shirma i alabes fan di Aretha Franklin, meskos kune. E grupo musikal ta konsistí entre otro di tokadó di fió, trompèt, trombon, saksofon, drùm i di un koro. Nan tur a yuda Shirma Rouse ku su produkshon sin kobr'é nada.
Gira di teater
Rouse ta konta ku e areglo i musikalisashon a keda asina bon, ku henter e grupo ta sumamente orguyoso i kontentu ku e proyekto. Despues di zomer tin 20 presentashon programá pa tuma lugá den teater rònt Hulanda. Shirma ta masha kontentu ku e disko kompakto ta bon toká na emisoranan di radio na Hulanda. E ta risibiendo hopi invitashon tambe pa papia i kanta den programa popular di radio i televishon. E echo ku ta invit'é konstantemente na eventonan di renombre pa hasi presentashon ta konmov'é enormemente. Den zomer e ta na Kòrsou i su deseo ta pa presentá su homenahe aya tambe.
Aporte di Hapon
Shirma Rouse ta konta ku e mes kas diskero hapones, ku a adoptá su promé produkshon 'Chocolate coated dreams', a enkargá su mes di e CD ku e homenahe na Aretha Franklin. E intenshon ta pa lans'é dia 30 di mei na Hapon.

Por skucha piesanan di e gran kantante merikanu di soul, manera 'Think', 'Respect', 'Natural woman', 'I never loved', 'Sweet lover', 'Until you come back to me' i shete otro mas riba e CD i riba enternèt. E deseo mas grandi di Shirma Rouse ta pa Aretha Franklin mes skucha e produkshon aki.