Tweede Kamer prekupá ku e situashon na Sint Maarten

Por garantisá estado di derecho na Sint Maarten. I ta kombatí korupshon i kriminalidat di un manera bon? Pregunta di diferente miembro di parlamentu hulandes ku ta súmamente preokupá ku e kalidat di gobernashon na e eisla. Estado Unidos tambe lo ta hopi preokupá.
Segun Eric Lucassen di PVV Sint Maarten ta un paraíso di kontrabanda pa motibu ku duana na e isla no ta bon ekipá. E parlamentario a bisa den Tweede Kamer ku un tersera parti di tur kontrabanda di droga ta bai via di haf di Sint Maarten. Segun Lucassen e isla tin un potenshal ekonómiko grandi pero ta di lamentá ku mayoria parti di esei ta trata trafikashon di droga. Motibu pa esaki segun e parlamentario di PVV ta e hecho ku duana di Sint Maarten asta segun kriterionan karibense ta un kos di hari.
Koroptu
Hero Brinkman, e parlamentario independiente ku a bandoná PVV, e partido di Geert Wilders, a bisa ku e fiskal na Sint Maarten ta hasi su maksimo esfuero pa kombatí kriminalidat na e isla. Pero gobièrnu di Sint Maarten ta stroba e fiskal den su trabou. Un ehèmpel di esaki segun Brinkman ta e hecho ku e fiskal mester pidi pèrmit pa kumpra material ku ta nesesario pa hasi su trabou. Segun Brinkman e gobièrnu di Sint Maarten ta tur korupto ku tin.
Brinkman ta di opinión ku e situashon na Sint Maarten ta saliendo kompletamente for di man. Por dedusí esaki por ehèmpel for di e kantidat di transakshonan sospechoso na e punto di notifikashon MOT.
Stèmpel
E parlamentario a duna mas ehèmpel di korpushon na e isla. E ta bisa ku el a tende ku tin diferente stèmpel na benta ku ilegalnan ta usa pa legalisá nan estadia na Sint Maarten. Segun Brinkman polis ta haña orden di nan superiornan pa laga kriminalnan na e isla ku ta siñalá internashonalmente na pas.
E parlamentarionan a hasi nan remarkenan durante e debate di djaweps 19 di aprel ku minister Spies di Asuntunan Interno i di Relashonnan den Reino.