Gobièrnu di Sint Maarten a kai

Gobièrnu di Sint Maarten a kai despues ku lider di frakshon Romain Laville di e partido United Peoples a sali for di e frakshon. Laville a bisa ku e lo sigui komo miembro independiente. Ku esaki gobièrnu di promé minister Sarah Wescott-Williams no tin mayoria mas den parlamentu.
E partido United Peoples (UP) di Theo Heyliger tin seis asiento den parlamento i ta forma un koalishon ku Democratiche Partij (DP) di promé minister Sarah Wescott-Williams. DP tin dos asiento den parlamento. Huntu ku e miembro independiente Patrick Illidge e koalishon tabatin nuebe di e diessinku asientonan.
Mayoria di NA
Romain Laville a bisa ku e lo bai sostené partido di oposishon National Alliance di William Marlin. NA tin sinku asiento den parlamento. Pero banda di sosten di Laville e frakshon lo haña sosten tambe di e dos parlamentarionan independiente ku tabatin kaba, Patrick Illidge i Frans Richardson. Esaki ke men ku NA nèt nèt tin un mayoria pa por forma un gobièrnu nobo.
E krisis den gobièrnu di Sint Maarten ta bini durante e wikènt drùk di karnaval. Despues di Jouvert Morning riba djasabra lo sigui diferente fiesta di karnaval. Djaluna 30 di aprel tin e parada grandi di karnaval.