Dia Di Rèi mester warda un ratu mas

Segun personanan ku informashon konfidensial, rèina Beatrix ainda ta disfrutá di su ´ofisio´. Riba 30 di aprel e ta bolbe selebrá aña di larèina, e biaha akí na dos kaminda den sentro dje pais [Rhenen i Veenendaal]. Marká pa drama personal i nashonal, tòg e no ta pensá pa apdiká ainda. Segun Ben Kolster, spesialista riba tereno di kas real, e ta determiná pa tene e pais riba riel den e témpunan turbulento aki.
‘Beatrix, Oraño bou di kandela’ t’e título dje seri di televishon ku ta konsistí di kuater parti i ku VPRO a transmití e wenter aki. [Un aktris hulandes famoso] Willeke van Ammelrooy ta hunga ròl di un Beatrix mas bieu, marká pa drama personal i nashonal. Den e produkshon aki [pa pèn di Tomas Ross] ta parse ku no tin nada k’e soberana no a eksperenshá durante su rèinada.
Esaki ta konta prinsipalmente riba tereno personal. E enfermedat di su kasá prens Claus, e problemanan polítiko rondó dje kompromiso i kasamentu dje prens di Oraño ku Máxima Zorreguieta, su prima Margarita di Bourbon-Parma ku a kòrta lasonan familiar, i e atentado na Apeldoorn riba aña di larèina na 2009. Banda djesaki awor por konta tambe e aksidente dramátiko di ski di su di dos yu hòmber Friso.
No tin sentido pa spekulá
Den e pelíkula aki ta parse ku rèina Beatrix tòg ta drumi lanta k’e pregunta ki dia, i prinsipalmente di ki manera e mester pasa e trono pa su yu hòmber Willem-Alexander. Ta un pregunta ku tur aña tambe ta bini bèk riba dia di su mes hasiment’i aña, i fin di aprel rondó di aña di larèina. Segun derecho polítiko ta e soberana – i niun otro hende – ta disidí ki dia i kon e ta apdiká. Esaki kemen ku no tin sentido pa niun otro hende spekulá ki dia Beatrix lo baha fo’i trono. Aunke tin un par di siguidonan di Oraño ku gustosamente ta sugerí di sa mas.
Pero ki posibel motibu rèina Beatrix por tin pa kualke momentu retirá for di su funshon komo lider di estado? Su salú korporal i spiritual? Pero te kaminda nos sa, esakinan ta den bon kondishon. Personanan ku informashon konfidensial ta mèldu ku ainda e ta disfrutá di su ‘ofisio’. Kisas motibunan familiar? Ta konosí ku e ke laga su yu hòmber i nuera disfrutá di nan famia yòng mas tantu ku ta posibel. Rekuerdonan di su añanan felis huntu ku Claus i e muchanan na kastel Drakensteyn ta hunga un ròl grandi akinan.
Diskurso di pasku
E desaroyonan nashonal polítiko i sosial dje momentu aki? Ku preokupashon e ta sigui e partishon dje sentro polítiko na Binnenhof, k’un tempu tabata asina stabil, i e kresementu di partidonan populista di banda robes i drechi. Esakinan ta desaroyonan riba kua e no tin mag di reakshoná públikamente, pero riba kua su disgustu timbia ta zona sutilmente den su diskurso di pasku anual. Awor k’e gabinete di Rutte a kai, k’e krisis ekonómiko ta persistí, i ku elekshonnan nobo ta planiá pa tuma lugá na prinsipio di sèptèmber, e lo ke pone tur su eksperensha huntu un biaha mas pa tene e pais riba riel.
Dia di Rèi
No tin duda k’e soberana ta spera ku e situashon di Hulanda por stabilisá i kalma p’asina e por pasa su mishon pa su yu hòmber. Pasobra e sa tambe, naturalmente, ku aki poko tempu un generashon-Oraño nobo ta inevitabel. Privadamente esaki no lo yega n’e interkambio dramátiko di palabra manera e seri di televishon ta sugerí. Pero esaki no ta kita k’e variante aki tabata prèt pa wak. Djis ta aña di larèina atrobe, pero no ta falta hopi promé k’e Dia di Rèi habri.