Lie-Marvin Bonevacia klasifiká pa weganan olímpiko 2012

WILLEMSTAD - E atleta yu di Kòrsou Lie-Marvin Bonevacia a klasifiká pa partisipá na Weganan Olímpiko di Londres 2012. El a logra e klasifikashon un siman despues di a kibra rekòrt nashonal den e final di kompetensia universitario na Pto. Rico.
Curacaose Atletiek Bond (CAB) ta partisipá Lie-Marvin Bonevacia a marka 28 di aprel den Grand Prix di Medellin, Colombia, un tempu di 45.77 sekònde riba distansha di 400 meter i asina a klasifiká su mes ku ‘standard B’ (45.90 sek.) pa Weganan Olímpiko.  CAB ta informá ku te asina leu ku e organisashon ta na altura, Bonevacia a bira e promé yu di tera pa klasifiká pa Kòrsou mes pa bai Londres, kaminda lo e kore komo atleta di eks-Antia Hulandes bou di bandera olímpiko. Pa loke ta trata e kareda mes na Medellin, Bonevacia a drenta na di dos lugá.
Un otro notisia hopi positivo relashoná ku e prestashon aki Bonevacia ta e hecho ku el a kibra su mes rekòrt nashonal (46.11) establesé un siman pasá riba e distansha en kuestion. Promé ku esei e rekòrt di Kòrsou riba 400 meter tabata di 46.13 sekònde riba nòmber di Churandy Martina, koré na El Paso, Texas, riba 31 di mart 2007. Pues siman pasá ya Bonevacia a pone e rekòrt riba su nòmber i ayera a drecha esaki.