Boletin di notisia di 30 di aprel

Reina Beatris ta selebrá aña di Lareina na Veenendaal i Rhenen
Reina Beatris ta selebrá aña di Lareina na Veenendaal i Rhenen. Mas ku 60 mil persona a akudí na e dos siudatnan pa selebrá huntu ku famia real. Na final Reina Beatris a yama danki i a bisa di ta 'lamentá i ta tristu' ku su famia no ta kompleto. E lo duna kumindamentu di pueblo na kas. Sin menshoná su nòmber Lareina a referí na prínsipe Friso ku ta den koma for di 17 di febrüari, despues di un aksidente ku a tuma lugá durante skimentu. Apesar di esei, tabata un dia inolvidabel na Veenendaal i Rhenen, asina Reina Beatris a deklará. Remarkabel tabata ku el a haña mash bukèt di flor. Posiblemente di e manera aki pueblo tabata ke duna muestra di sosten enkuanto e situashon di Friso. Famia real a tuma nan tempu pa pasa wak tur e aktividatnan ku a organisá pa nan. Esei a pone e programa di selebrashon dura mas ku a palabrá. Awemainta promé minister demishonario Rutte, a manda un mensahe di vidio pa e famia real deseandonan un dushi Koninginnedag. E ta spera ku e dia lo kana bon. I tambe el a bisa ku prens Friso i su famia ta den su pensamentu.
Reina Beatris su popularidat a subi último aña
E popularidat di Reina Beatris a subi último aña. Esei ta resultado di un enkuesta tokante dia di lareina ku emisora di televishon NOS a laga hasi. Di tur e enkuestadónan 81 porshento ta 'satisfecho' of 'mas ku satisfecho' ku e reina. Aña pasá 77 porshento tabata kontentu ku Lareina. Hulandesnan ta mashá kontentu ku monargia. Prinsesa Máxima ta keda esun di mas stimá, Reina Beatris ta sigui na di dos lugá.
Atentado na Siria, 8 morto
Dos atentado na deposito di bòm militar na siudat sirio Idlib a kosta bida di 8 persona. Mas ku 100 a keda heridá. Oposishon sirio ta bisa ku mas ku 20 persona a pèrdè nan bida. Televishon di estado sirio a partisipá ku ta teroristanan suisidal a kometé e atentado. E edifisio militar di seguridat lo tabata meta di e atentadonan. Prinsipalmente miembronan di servisio di seguridat a fayesé. Awemainta tempran e bòmnan a eksplotá tras di otro. Un di nan a eksplotá den bisindario di un hotèl kaminda observadónan di Nashonnan Uní ta keda.
Periodista franses ta disparsé na Colombia
Un periodista franses a disparsé na Colombia. Roméo Langlois tabata na Colombia pa traha reportahe pa un emisora di notisia franses. Pa esei el a drenta mondi huntu ku algun militar. Nan tabata buskando un laboratorio di droga na momentu ku luchadónan di FARC a atakánan. Langlois a keda heridá na su man. Outoridatnan franses ta kere ku a sekuestra e reportero. Minister kolombiando a bisa ku FARC ta responsabel pa salú di Langlois. Komandonan di ehèrsito kolombiano ta enbuska di e franses.
Eks minister di Libia a fayesé na Oustria
Eks minister di Libia, Ghanem ku tabata enkargá ku asuntunan di petroli, a fayesé na Oustria. A haña su restunan den riu Donau. Ghanem tabata e delaster minister libio di petroli bou di mando di kolonel Kadhafi, loke ta nifiká ku e alabes e tabata kabes di e kompania di petrolo di estado. Aña pasá mei, durante di e rebelion kontra Kadhafi, Ghanem a kibra tur laso ku e régimen di Kadhafi i a hui bai for di Libia. For di Oropa el a kondena e 'violensha insoportabel' di mando libio. Segun polis oustraliako no a haña rastronan di violensha riba su kurpa. Posiblemente el a bira malu i a kai den e riu Donau.
Kabes di observadónan di Nashonnan Uní na Siria ta urgi pa mantene na e plan di pas
General Robert Mood, ku ta enkabesa e tim di observadónan di Nashonnan Uní na Siria, a urgi tur partido pa mantene nan mes na e tratado di pas di Nashonnan Uní. Simannan benidero ta bai amplia e kantidat di observadónan na Siria. Aktualmente tin 30 observadó i esei ta bai bira 300. E observadónan no ta karga arma. Na su yegada na Damasko, Mood a urgi tur hende pa para tur dramamentu di sanger i pa mantené nan mes na e tratado di pas. Solamente ku forsa konhunto por logra pas, asina e general noruego a bisa.
Bionario ke laga traha réplika di Titanic
Un bionario oustraliano ke laga traha un réplika di e barku Titanic. Clive Palmer, un di e habitantenan di mas riku di Oustralia, a duna un kompania chines enkargo pa efektua e konstrukshon. Esei lo kuminsá na final di 2013. E luna aki ta eksaktamente shen aña pasá ku e Titanic a senk. E barku nobo lo ta mesun kos ku esun bieu, ku mesun luho i mes midi. Pero e barku lo tin un sistema di moderno di navigashon i di téknologia di seguridat. Si tur kos kana bon e barku lo ta kla na fin di 2016. E promé biahe lo ta di Londen pa New York.
Shòfùr di bùs ta pèrdè reibeweis
Un shòfur ku a hasi su máksimo esfuerso pa su pasahero logra kue su siguente bùs, a pèrdè su reibeweis na Utrecht. E suseso a sosodé di djasabra marduga pa djadumingu. Segun polis e shòfùr a kore muchu duru den sentro di siudat di Utrecht. El a basha pita i pasa den lus korá.
Don Diego ta gana premio Faas Wilkes
Bòksdó Don Diego Poeder a gana premio Faas Wilkes. E èks kampion mundial a sera su karera komo bòksdo durante un duelo kontra e ruso Peretjako ku a tuma luga na Rotterdam. Don Diego Poeder a gana e duelo. Pa algun aña kaba Poeder no ta bringa mas pero el a kuminsa trein atrobe pa ta den den bon kondishon durante e duelo di despedida.
Wer na Hulanda:
Solo ta bria pero mèrdia ta nublá. Temperatura ta entre 18 i 22 grado. Awenochi awa ta kai na parti sùit di Hulanda. Mañan ta nublá i awa ta kai ku chèns di mal wer. Temperatura ta 17 grado.