Resúmen di korant hulandes 30 di aprel (aña di larèina)

De Telegraaf ta e úniko matutino ku ta felisitá Larèina ku su dia, riba su portada. Naturalmente e otro matutinonan tambe ta presta atenshon na e dia festivo aki. AD a públika un potrèt di Reina Beatris riba su portada, ta trata di un potrèt di un eskultura trahá di santu di Lareina. Nan a trah'é na Rhenen.
Trouw i De Telegraaf tambe a públika e mesun potrèt di futuro reina di Hulanda riba nan portada. Por mira poster grandi di prinsesa Amalia ku ta kologa riba edifisio di bar De Blaffende Vis na Amsterdam. Amalia ta bistí na Oraño i ta tene su selular den su man pa manda un mensahe. Ta trata di un akshon speshal di Aña di Larèina.
Tambe un sinòpsis den Trouw kon otro paisnan ta selebrá Aña di Larèina. No ta selebra dia di Larèina na Spaña. Na Suesia ta selebrá hasimentu di aña di futuro reina Victoria. Rei di Dinamarka ta para riba balkon kada 16 di aprel 12ór en punto pa zuai man i kuminda su pueblo. Na Inglatera riba 21 di aprel, dia ku Reina Elizabeth ta hasi aña, 12ór di mèrdia en punto ta laga kañon tira 41 tiru na Hyde Park, na Windsor Park kañonnan ta tira 21 tiru i na Tower of Londen kañon ta tira 62 tiru.
Mas notisia den e matutinonan djawe: dos aktor kubano su ròl den pelíkula ta bira realidat. Javier Nunez i Anailin de la Rua a hunga komo buskadó di asilo den e pelíkula Una Noche. Nan a bai pidi asilo na Merka. Awor di bèrdat nan ta bai pidi Merka asilo, segun De Telegraaf. E dos aktornan di 20 aña tabata na kaminda pa bai un festival di sine na New York pero a disparse despues di un pousa na Miami. Awor nan ta spera di por traha na Hollywood.
Un momentu di kambio. Asina representantenan di gruponan den minoria ta yama kaida di gabinete Rutte, esta segun de Volkskrant. No tin sentido pa kombati Wilders, ta tempu pèrdí. A desenmaskará e lider di PVV, e ta un polítiko egoista i awor ta kita su puntonan for di agenda. Ta pesei gruponan di minoria por dirigí nan flecha mas miho riba otro asuntunan manera entre otro: kombatimentu di deskriminashon i un debate polítiko ku mas respèt. E organisashonnan ta realisá nan mes ku no nesesariamente e pensamentunan di Wilders lo disparse pero ahinda nan no tin un bon strategia kon ta bai kombati esei, segun de Volkskrant.
Un entrevista ku bòksdó Don Diego Poeder den Trouw. El a gana su delaster duelo pero e tabata ke pa e duelo tuma lugá na Rotterdam, asina el a bisa. Su promé despedida a tuma lugá sinku aña pasá na Amsterdam pero e no tabata satisfecho. Ta pesei el a bisti su wantenan di bokseo atrobe. E bòksdó di 40 aña di edat, ta sufri di malesa, loke a pone treimentu pa un duelo nobo bira hopi pisa. Su kompañera ta haña teme pa su salu. "Pero e lucha ta pasa un bes", esta segun Poeder, " i despues di esei nos por sigui ku nos bida." Traha pelíkula ta su futuro.
Kada dia militarnan ta yuda polis i hustisia. Nan ta observá kriminalnan, ta asistí ora tin invashon i ta buska esnan pèrdí, asina ta pará den Nederlands Dagblad. Segun komandante Mart de Kruif, ta desaroyá diferente kapasidat durante mishon na Irak i Afghanistan ku lo por implementá tambe riba kaya na Hulanda. Kapasidatnan ku hopi biaha polis hulandes no tin.
'Mester públika nòmber di esnan ku ta maltrata medio ambiente', asina komisario di polis Roel Willekens a deklará den matutino Algemeen Dagblad. Mester públika nòmber di direktornan di empresanan ku no ta mantene nan mes na eksigensianan di seguridat pa proteha medio ambiente. Willekens ta haña ku hustisia i polis no ta hasi sufisiente pa kastiga kriminalnan di medio ambiente. Segun Willekens tin ku bin ku reglanan mas estrikto. Aktualmente ta duna e empresanan un but ora ku nan falta ku e reglanan pero nan mes por keda será segun e komisario den Algemeen Dagblad.