Aña di Lareina na Veenendaal i Rhenen a kana bon

Reina Beatris i su famia a bishitá suidatnan Veenendaal i Rhenen durante selebrashon di aña di Lareina 2012. Tur kos a kana bon na e dos siudatnan ku ta pertnesé na provinsia Utrecht. Na final Reina Beatris a gradisí ambos siudat pa nan kaluroso bon bini. Espesialmente awor ku su famia 'no ta kompleto'. E lo duna kumindamentu di pueblo na kas. Sin menshoná nòmber Lareina a referí na prínsipe Friso.
Prínsipé Friso ta den koma for di 17 di febrüari despues di a keda tapá bou di un ola di sneu (lawina). Su selebro a keda gravemente leshoná. Posiblemente e no ta sali mas for di e koma. Aktualmente e ta interná den un hòspital na Wellington, Londen.
E dia a kuminsá na Rhenen despues ku e konvoi blou di famia real a yega den kareda di 10'or. Prinsesa Mabel tampoko tabata presente na e festividatnan. Prinsesa Anita ta sufri di pulmonia i ta'tin ku diskulpá. Pieter van Vollendhoven a akudí na e di dos parti di e festividatnan ku a tuma lugá na Veenendaal. E tin un infekshon na su pia i no por kana bon. Awe ta kumpleañó di Pieter van Vollenhoven, e ta kumpli 73 aña.
E famia real a keda mas ku un ora na Rhenen, siudat históriko, kaminda a risibí nan ku un ola di blas oraño i blanku. Mas ku 200 mucha a kanta un kantika di bon bini pa nan. Despues nan a sali pa Veenendaal. Mas ku 500 mucha a risibi nan ku un obade. Despues di esei nan a kana pasa wak e diferente aktividatnan ku a organisá pa nan. Entre otro demostrashon di diferente fishi bieu: feitamentu di karné i trahamentu di sigá.
Festivo
Kolega di Wereldomroep Désirée Martis tabata presente na e festividatnan na Rhenen. E tabata un di e boluntarionan ku a yuda pa tur kos kana na ora. Martis a haña e ambiente mashá festivo. E no a nota nada di tristesa durante e festividatnan na Rhenen.