Monk: ‘Tula su eskoho pa libertat no por kambia’

“Riba 17 di ougùstùs 1795 Tula i su kompañeronan a bisa e doño di katibu di plantashon Kenepa ku nan no ta traha p’e mas komo katibu. Esaki tabata e promé paso den direkshon di libertat di opreshon di pueblo di Kòrsou. E eskoho aki no por kambia mas.”
Esaki minister Carlos Monk di planifikashon Gubernamental i Servisio a bisa públiko presente dia 30 di aprel den patio di Archivo Nashonal. E mandatario a desvelá un piedra konmemorativo na honor di Tula i 28 otro katibu ku a paga pa nan rebelion 217 aña pasa ku dekapitashon.
Históriko
Monk ta haña Tula su liderato ‘inspirashonal i históriko’. E minister a remarká ku e hòmber bon informá aki na un manera desente a eksihí ‘nada mas ku nos libertat’ seka e opresor kolonial. Esaki di su banda a reakshoná brutu ‘pa via miedo i pániko logra ku niun katibu lo no hinka den su kabes pa rebeldiá nunka mas.
Monk ta invitá un i tur pa bin bishitá Archivo Nashonal i haña informashon tokante e sakrifisionan ku a hasi “pa pone un fundeshi realista pa komunidat di Kòrsou”. E minister ta enfatisá ku ‘nos no t’asina leu ainda’: “Ketu bai nos ta luchando kontra forsanan ku ke tene nos den sklavitut di konsumismo. Nos tambe tin ku kibra e kadenanan aki pa desaroyá i mantené un komunidat berdaderamente desente”, segun Monk.
Sin rèspèt
“E eskoho pa desvelá e piedra konmemorativo aki riba 30 di aprel ta sin rèspèt”unYu di Kòrsou blanku yamá Nelson ta bisa na bon papiamentu, klaramente su idioma materno. E hòmber di 50 + aña di edat ta un di hopi hende ku na kaminda pa bai selebra Aña di Lareina na Punda, a pasa wak entre otro Grupo Trinchera na ‘Bolo di Batrei’, e nòmber di kariño pa Archivo Nashonal.
“Si bo ke honra Tula por hasi esaki dia 17 di ougùstùs. Pakiko riba Aña di Lareina? Duna kada ken su mes selebrashon riba su mes fecha no.” Ku un sonrisa pero sakudiendo kabes e ta sigui kana den direkshon di Punda, bistí na karson kòrtiku i un t-shirt oraño.