Boletin di notisia di 1 di mei

For di awe tin ku uza tarheta di marihuana pa drenta Coffeeshop
For di awe por drenta coffeeshopnnan ku ta keda na parti sùit di Hulanda, solamente ku un tarheta di marihuana. Ta bende softdrugs na e coffeeshopnan. E tarheta di marihuana ta enserá ku solamente hulandesnan registrá por drenta pa kumpra nan chèiba. Ya kaba polis a duna un coffeeshop na Tilburg un proses verbal pasombra nan no a mantene nan mes na e regla nobo. E negoshi no a registrá niun di su klientenan i a bende marihuana ku ekstranheronan. Doño di e lugá ke pa bin ku un periodo di prueba. Tres stranhero a hasi demanda di deskriminashon na Maastricht. Esei tambe tabata un akshon plania.
Sindikatonan ta reakshoná positivo riba plannan pa organisashon mama nobo
E dos sindikatonan di mas grandi ku ta forma parti di FNV a reakshoná positivo riba plannan di 'De Nieuwe Vakbeweging'. Awemainta parlamentario di PvdA, Jetta Klijnmsa, a presentá e konsepto pa lanta un sindikato mama nobo. Presidente Van der Kolk di FNV Bondgenoten ta pa gran parti satisfecho. E otro sindikato esta Abvakabo ta bisa di ta prinsipalmente kontentu ku introdukshon di un parlamentu di miembro. Pero sindikato di penshonadonan ANBO no ta mashá entusiasma. Segun nan ahinda ta posibel pa forma un bloke nobo. Simannan benidero kada sindikato ku ta kai bou di FNV ta bai reuní tokante e plannan di komishon Klijnsma.
Medvedev i Poetin ta presente na e marcha di dia di obrero
Presidente Medvedev i promé minister Poetin lo presensia e marcha di dia di obrero na Mosku. Segun emisora di notisia Russia Today mas ku 100.000 persona lo ta presente na e marcha. Djaluna awor ta huramenta Vladimir Poetin komo e presidente nobo di Rusia. Diferente grupo di oposishon ke protestá kontra e presidente i su partido. Nan a plania pa subi kaya riba 6 di mei pa marcha den e asina yamá 'Marcha di mion'.
Minister Spies ke bira lider polítiko di CDA
Minister demishonario Spies ke bira lider polítiko di partido CDA. Spies ta enkargá ku asuntunan di interior i relashonnan den reino. Spies a disidí di postulá su mes komo kandidato pa bira lider polítiko di su partido. E ke bai hasi esei ku tur su alma, asina el a deklará. E ta bira e di 4 kandidato pa bira lider polítiko di su partido. Anteriormente lider di frakshon di CDA, Haersma Buma i Marcel Wintels a postula nan mes komo kandidato. Harry Wesselink tambe ke bira e futuro lider polítiko di CDA.
Delta Air Lines ta kumpra refineria
Delta Air Lines, kompania di aviashon merikano, a kumpra un refineria. E kompania merikano a paga 150 mion dolar pa e refineria. Ku e kompra aki nan ta spera di por baha gastu di komustibel. Ta promé biaha ku un kompania aereo ta kumpra un kompania ku ta prosesa petroli. Delta, e kompania di aviashon di mas grandi na mundu, ta spera di baha gastu ku mas ku 300 mion dolar pa aña. E refineria ku a kumpra ta situá na Pennsylvania. For di sèptember aña pasá e empresa ta for di funshon.
Víktimanan di kriminalidat na Mèxico por haña sèn bèk
Víktimanan di organisashon di krímen organisá pronto por eksigi daño i perhuisio. Parlamentu a aprobá un lei pa respalda esei. Por ehèmpel vítkimanan di sekuestro por haña ayudo médiko, hurídiko of finansiero. Tambe famianan di esnan ku a keda asesiná por eksigí daño i perhuisio. Ta kalkulá ku mas o menos 70mil persona ta bini na remarke. For di 2006 presidente Calderon a disidí di uza ehèrsito den e lucha kontra kartel di droga na Mèxico. For di e momentu ei mas ku 50 mil persona a pèrdè nan bida.
Helikòpter ta kai na Colombia
Un helikòpter di forsa aereo a kai na Colombia. Tur 13 okupante lo a fayesé. E helikòpter a kai den bisindario di siudat Sabana Grande i a sende mesora na kandela. Agentenan polisial i militarnan tabata na bordo di e helikòpter. Forsa aereo kolombiano ta investigando e kaso.
Wilders ta desmentí plan di muda pa Merka
Lider di PVV, Wilders ta desmentí ku e tin plannan pa muda bai Merka. Aktualmente e ta na Merka pa presentashon di su buki. Ultimo lunanan a surgi rumornan ku Wilders lo ta bai sigui pasonan di Ayaan Hirsi Ali. For di 2006, Hirshi Ali ta traha den un denktank konservativo na Washington. Wilders tambe lo por haña un funshon bon pagá na Merka. Pero el a reakshoná desisivo na New York: Mi ta keda biba na Hulanda.
No un sino dos persona a tira Robert Kennedy mata
No un sino dos persona a tira polítiko merikano Robert Kennedy mata na 1968. Esei testigu Nina Rhodes-Hughes ta bisa. E tabata pará banda di Kennedy na momentu di e asesinato. Rhodes-Hughes ta pretende ku a skonde motibu real di e asesinato. E tempu ei tambe el a deklará na reshèrshi ku ta'tin un di dos tiradó. Pero nan a ignorá su deklarashon. A tira Robert Kennedy mata den un hotèl riba 5 di yüni 1968. A kondená hordano Sirhan Sirhan di 68 aña, pa su morto.
World Trade Center atrobe e edifisio di mas haltu di New York
E edifisio nobo di World Trade Center na New York atrobe ta e edifisio di mas haltu di e siudat. Ayera a logra konstruí e di 100 piso, ku tin un haltura di 387 meter. Esaki ta pone ku awor e asina yamá Toren di Libertat, Freedom Tower, ta 6 meter mas haltu ku Empire State Building. E edifisio lo tin un midi di 541 meter ora e keda kla. Otro aña lo finalisá konstrukshon di e edifisio.
Wer na Hulanda:
Solo ta bria de bes enkuando awemèrdia. Fuera di esei ta nublá i awa ta kai na parti nort. Temperatura ta entre 15 i 20 grado. Mañan ta hopi nublá i awaseru ta kai .