Resúmen di korant hulandes di 1 di mei

Tur matutino ta públika potrèt grandi di Reina Beatris durante selebrashon di Aña di Lareina. De Telegraaf i Trouw ta públika un potrèt kaminda Lareina ta sintá riba un kruk skuchando e kantika ku e muchanan di skol ta kanta p'é. E aña aki selebrashon di Aña di Lareina na Veenendaal i Rhenen tabata un muestra públiko di sosten pa e tempu difisil ku Reina Beatris ta pasando aden, segun De Telegraaf. Tabata komo sifuera un grupo grandi di amigunan a bai para rondo di famia real, ku tin ku dil ku aksidente di ski di prínisipe Friso.
AD ta públika un potrèt kaminda reina Beatris ta hari. Presensia di su altesa na Veenendaal i Rhenen ta mustra su balentia, esaki ta pone ku públiko a haña mas respèt i atmirashon p'é. Spits ta komentá ku tabata un dia kasi perfekto, ku hopi solo, niun akontesimentu partikular i un famia real gradisido. Pero tòg tabatatin un sintimentu amargo ora para ketu na e echo ku prens Friso i prinsesa Mabel no tabata presente.
'Isla asesino', ta titular di un artíkulo den De Telegraaf kaminda ta hasi e pregunta kon tin ku sigui ku pais Kòrsou. Ta duna e isla un imahen negativo. E aña aki ya kaba a komete 9 asesinato. Por kompara e kantidat di habitantenan di e isla ku e kantidat di habitante di e siudat hulandes Breda. Pero kontrario na e siudat hulandes, Kòrsou tin un gobièrnu i un minister di hustisia pa sòru pa un bon maneho. Pero segun e matutino prinsipalmente grandinan, famianan di militarnan hulandes i hendenan muhé ta blanko di e kriminalnan. Promé minister Schotte a deklara ku hubentut tin ku sòru pa kambio. Pero e mes ta kere esaki? Esei ta pregunta ku De Telegraaf ta hasi.
For di aña pasá kubanan tin mag di kuminsá ku nan mes negoshi i tur kaminda tiendanan ta habri. Nan ta trese hopi kolo na kapital Havana. Awe un reportahe di esaki den Trouw. Hendenan ta bende pan i kòfi, restorantnan chikí ta krese manera padestul. Tur kas ta pone kamber disponibel pa hür ku turista. Ya kaba a duna mas ku 370 mil pèrmit.
Tabata imposibel evitá ku lo a bin negoshinan chikí segun Trouw. Tabata obvio ku e plan ekonómiko sosialista di Cuba lo no a funshoná. E plan di komèrsio lo tin ku solushoná algun problema i yuda e 500 mil ambtenarnan ku ta bai pèrdè nan trabou. Pero no tin mag di kuminsá ku un fábrika. Ta pesei awor Cuba tin dos sistema: ekonomia plania ku tin ku fungi komo suministro pa estado i banda di esei tin e empresanan chikí.
Hopi biaha muchanan ku ta biba serka famianan di kriansa of den internat ta víktima di abusu seksual. No pa papia mes di muchanan ku un hèndikèp. Segun un investigashont a abusá dòbel mas tantu biaha di nan. Esei De Volkskrant a públika a base di un rapòrt di sientífikonan di Universidat di Leiden ku a lèk. Nan a haña enkargo di komishon Samson pa traha e rapòrt. E komishon ta investigá kasonan di abusu seksual di muchanan den instansianan gubernamental. Fin di aña ta públika e rapòrt.
Sigur 15.000 hulandes no tin entrada mas despues di a stòp ku onderstant. Esei ta pará riba portada di Het Nederlands Dagblad. No ta konosí kon e personanan aki ta sobrebibí. Motibu ta ku munisipio ta nenga di investigá esei. Konseho di Labor i Entrada i Inspekshon di Labor i Entrada a konkluí na 2008 i 2009 ku un di kada 3 kobradó ku ta stòp ku nan onderstant ta keda largu tempu sin entrada. Otronan ta duna nan sèn, of nan biba di sèn ku a spar of nan ta hasi trabou inlegal.