Food festival: kuminda i ganga

Food Festival 2012 na Kòrsou parse a logra bon, mirando e kantidat di hende ku tabatin na Rustenburgh dia 30 di aprel i promé di mei. Públiko a bini pa kome bokadio for di diferente kushina lokal pero oriental tambe. E buskamentu di ganga tambe tabata pisá.
Di asesorio te trato di uña pasa telefonia i dvd te artíkulo pa hasi bida di hende bieu mas fasil i het pa fangu aw’e yobe. Mester interpretá e palabra ‘food’ hopi amplio, pa asina e por kontené asta seguro di entiero.
Keiru ku famia
E festival ta masha popular komo manera pa keiru ku hente famia. Beibi den buggy, mucha ku ta kore kokobiá di un lugá di mangel pa otro, (pero nan tabata loko ku e pòninan tambe), tiner ku ta kana suin i adulto hoben, pareha i hende bieu: tur tabata manera vruminga riba e tereno di e Festival.
Kontentu e hendenan grandi di edat ta kana un pi’un pia ta wak e stèntnan. Esnan den ròlstul ta pusta boka ku esun ku ta pusha tokante e ruta ku mester kore. Pero entusiasmo i alegria ta reina.
Lion Fish
Hopi hende no a haña chèns di purba e lion fish notorio na Food Festival. Na sigur dos luga tabata hasi propaganda p’e, segun nan ta bisa, kuminda sabroso aki –un stènt asta tabata karga e nòmber Lion Fish – pero djaluna e piskanan aparentemente no por a haña kaminda pa yega Rustenburgh i djamars asta tabata usa e stènt pa lugá di sinta.
Es ku a bai Boca Samí pa Sami Sail sí por a purba kon lion fish ta smak. Di tur manera por a mir’é den e akuáriùmnan pará seka un bòrchi di informashon na Boca.
Ya ta sinku aña kaba ku no tin masha zeilmentu na e Sail aki. Bon mirá e evento a bira un Ban Topa ku hopi kuminda di laman, kos dushi i muzik live. Fundashon Sami sail ta spera di kambia esaki otro aña. Promé mester drecha opstákulo organisatorio i finansiero.