Marlin: ‘Kos lo bira mihó pa Sint Maarten’

Sint Maarten tabata sufri bou di e gabinete anterior ku United People’s Party (UP), nan tabata fokùs solamente riba nan propio interes. Esaki William Marlin di National Alliance (NA) ta haña.
E koalishon nobo – ku a forma dia promé di mei – segun e lider di NA tin ‘e deseo fuerte di kuminsá traha di un manera ku henter pueblo di Sint Maarten for di awe lo biba mas mihó’.
UP, ku e sinku asientonan ku nan a sobra, ta resultá den oposishon. Romain Laville, ku e asiento ku e ta bai kuné di UP, ta djòin e koalishon nobo. E miembronan independiente, Patrick Illidge i Frans Richardson, ku anteriormente a kibra ku NA pero ku a keda ku nan asiento, tambe ta sostené e koalishon nobo ku ademas ta kontené Democratic Party (DP) ku dos asiento i NA ku 5 asiento – un total di 10 asiento.
Baké
Marlin ta pensa ku ‘por logra masha hopi ainda’den e dos añanan ku gabinete tin su dilanti. Asta si e di kuater aña lo ta den preparashon pa (re)elekshon segun Marlin “por logra hopi kos konkreto, pasobra e tim nobo di minister i e konseheronan rònt di nan ta polítiko i profeshonal baké, ku eksperiensha den Eilandsraad i Antia anterior”.
Marlin ta konfirmá ku lider di DP Sarah Wescot-Williams den e gabinete nobo tambe lo ta promé minister. “El a pidi esaki i mi no ta haña ta problema pa e keda promé minister dos aña mas. Nos ta fokùs riba e trabou ku tin ku hasi awor.”
Vise promé minister
Kon e gabinete nobo lo bira definitivamente i kua proyektonan lo kaba den e dos añan, Marlin no ke bisa ainda. Tampoko e no ta reakshoná riba e rumor ku e lo bira vise promé minister ku tur nv di gobièrnu bou di dje.
“Aki dos siman nos lo trese nos programa di gobernashon ku e repartishon di kartera. Di mes lo por rekonosé asuntu di e kampaña di elekshon ku NA na 2010 a gana elekshon kuné.”