‘Siña di sakrifisio lokal den di Dos Guera Mundial’

Kòrsou tambe a aportá na e viktoria di aliadonan den di Dos Guera Mundial. Anto en grande: 75 porshento di tur petroli pa e merikano-, britániko- i rusonan a bini di e refinerianan di Aruba i di Kòrsou. Aparte di esei Aruba i Kòrsou a provee hende – entre otro den schutterij – pa batayá.

Aruba ta honra su heroenan di guera tur aña. Pero na Kòrsou un konmemorashon asina no ta biba mashá. Poko hende sa mes ku nos a konosé un suseso naval di e índole di Pearl Harbour envolviendo e barku di guera USS Erie. I ku pa kolmo asta tin un monumento na Nieuwe Haven pa rekordá e insidente di guera akí – pero e monumento ei mes tambe ta deskuidá i lubidá.

Chines
Mayor Allan van der Ree i historiadó Gedion Isena ta hasi esfuerso pa Kòrsou – i sigur su hobennan – ta konsiente di loke e isla a nifiká pa paz i libertat mundial. I ku hendenan djakí – i índirektamente binti chines tambe – a duna nan bida den un konflikto humano pa fasilitá nos bienestar.

Van der Ree i Isena ta konvensí ku apresio pa, i reflekshon riba nos lugá den historia di guera mundial lo yuda nos pa evitá pleitamentu awendia. Ademas nos lo tin mas motibu di ta orguyoso di nos pasado i di nos identidat.