Aksidente di tráfiko ku morto

WILLEMSTAD - Djasabra, 5 mei 2012, alrededor di 20.09’or, Sentral di polis a dirigí un patruya
na Schottegatweg OOst pa un aksidente ku a kaba di tuma lugá i di kua un di e personanan envolví no tabata duna señal di bida.
For di un investigashon preliminar a resultá ku un outo tabata koriendo riba Schottegatweg Oost  direkshon di Biesheuvel. E outo aki dado momento a sòrter na man robes i a para einan ku e intenshon pa lora drenta Rooi Catootjeweg.
E shofùr a laga un outo ku tabata bini di Schottegatweg Oost direkshon rotònde pasa i despues a lora na man robes pa subi Rooi Catootjeweg na momento ku un motosaikel tabata biniendo. E shofùr aparentemente  no a ripara ku un motosaikel tabata aserkando for di direkshon kontrali.
Dor di e akto aki e motosaikel a bai dal kontra di e parti dilanti di e outo. E shofùr di e motosaikel e hòmber Joandro Eldoy Juliana, nasé na Kòrsou 12 yüni 1986, a bin kai un distansia for di e motosaikel i a risibí fraktura na kabes i rònt su kurpa.
E víktima J.E. Juliana  a fayesé na e sitio mes a konsekuensia di e leshonnan ku el a risibí. Ámbos vehíkulo a keda konfiská pa mas investigashon tékniko.