Kiebro di konfiansa Wilsoe i OM Curaçao
Un kiebro di konfiansa entre Ministerio Públiko (MP) i hefe di MP, prokurador-general (PG) Dick Piar, ta motibu pa minister di Hustisia Elmer ‘Kadè’ Wilsoe atendé e kaso kontra Dos Santos personalmente. “Kana no ta wanta, sino te na rant”, asina Wilsoe a resumí su relashon ku PG.
Djamars atardi Wilsoe a yama un rueda di prensa pa duna su vishon riba e akusashonnan komosifuero ta e lo a intervení personalmente den kaso-‘Bientu’.
Den e kaso akí ta akusá Robertico ‘Robbie’ Dos Santos, doño di loteria, i tambe un kantidat di su negoshinan di labamentu di plaka, froude fiskal i di falsifikashon di dokumento. Riba petishon di Hustisia outoridatnan merikano a kongelá un saldo di alrededor di 28 mion dòler di negoshinan di Dos Santos, ku éksito.
[related-articles]Dos Santos ta ruman hòmber di minister di Finansa, George Jamaloodin, ku ademas - sea diskretamente – tabata presente na e rueda di prensa.
No infalibel
Segun e minister, un kantidat di artíkulo di mr. Peppie Sulvaran ta konfirmá e asuntu di konfiansa: “Esaki ta mustra ku Ministerio Públiko i Korte no ta infalibel”, Wilsoe ta bisa. Sulvaran ta e abogado ku a sabi di anulá e ponementu di beslag personal riba biennan di Robbie Dos Santos ku éksito.
E minister ta bisa ku tabatin deliberashon amplio entre su persona i Dick Piar, promé ku a manda e karta pa Hillary Clinton. Ministerio Públiko ta desmentí esaki. Loke a pasa ta, ta ku Merka a pone MP na altura di e karta di minister.
Posishon formal
Aunke e minister ta bisa ku e relashonnan a normalisá atrobe, Piar a bolbe pone su posishon formal nobo bou di atenshon di outoridatnan merikano. “Damage control’, asina vários hurista ta yama e akson akí di MP. Relashoná ku esei Wilsoe ta bisa ku Piar ta liber pa tene un opinion ku ta diferente for di esun di minister, kon tal e sigui direktiva di minister.
Wilsoe ta desmentí apódikamente ku el a mete den un asuntu ku ainda ta kai bou di wes. “Ku e karta akí mi ker a stret e imágen ku Merka tin di nos, esta ku fiskal por pone un desishon di wes un banda. Netamente esei no por.”
Distinkshon
Wilsoe ta referí ku esaki riba ponementu di e beslag konservatorio di e saldo riba nòmber di Dos Santos, di kua e eliminashon a keda rekomendá dor di hustisia. Ministerio Públiko a puntra wes komisario tambe pa un di dos beslag konservatorio por si en kaso e plaka lo no pertenesé na Dos Santos, pero na un persona hurídiko (por ehèmpel un kompania di Dos Santos).
Wilsoe no a hasi distinkshon durante e konferensia di prensa entre e dos ponementunan di beslag akí. Ta solamente e promé beslag a keda eliminá dor di Korte di Promé Instansia.
Durante e rueda di prensa reporteronan presente a haña un A4 di minsiter den kua e mandatario ta duna splikashon hurídiko i ta tuma posishon kontra di legitimidat di e ponementu di beslag, ehekutá pa su propio aparato hudisial: “I mi por hasi esei, pasobra ta ami ta e ‘Competent Authorithy’, manera deskribí den un par di tratado entre Reino Hulandes i Estados Unidos di Merka.”