‘Bientu’ riba agènda deliberashon di hustisia na Aruba
‘Bientu’, e investigashon kurasoleño di posibel froude i labamentu di plaka di doño di loteria lokal Robertico ‘Robbie’ dos Santos, lo ta riba agènda di e deliberashon hudisial di kada seis luna di e kuater paisnan na Aruba yüni binidero.
Hulanda ke ‘rekonfirmá’ ku e ministernan den Reino ta mantené ‘kódigo di komportashon komun’. Intervenshon den un investigashon hudisial, manera e minister di hustisia Elmer Wilsoe ta hasi den ‘Bientu’, no ta pas den esaki. Hulanda ta kritiká ku Wlsoe su manera di hasi ta ‘krea aparensha di konflikto di interes’’i ta ‘daña prestigio di Reino riba nivel internashonal – seka partner geopolítiko importante Estádos Unídos’.
‘Sin interupshon’
Motibu di Hulanda pa pone Bientu riba agenda na Aruba ta sali for di palabranan di minister di hustisia Liesbeth Spies despues di konseho di minister di Reino djabièrnè 11 di mei 2012: “Hulanda ta sali for di e punto di bista ku e investigashon Bientu ta sigui sin interupshon.” No ta kla kiko Hulanda lo hasi si Wilsoe sigui kibra ku e ‘kódigo di komportashon’.
Prokurador general Dick Piar, ku djadumingu 13 di mei 2012 ta bai Hulanda pa trabou, no tin ‘niun sorto di konfiansa’ di Wilsoe. Segun Wilsoe e PG ta duna informashon robes tokante Bientu, lo ta gaña tokante di kantidatnan di beslag den e kaso Bientu, lo no ta sigui orden di wes i ta debilitá outoridat ministerial.
Segun Wilsoe nunka Ministerio Públiko (OM) no mester a kuminsá un investigashon di Dos Santos su asuntunan “pasobra Direktor di Belasting no a kuminsá un investigashon fiskal kontra e doño di loteria i asina no a pasa niun investigashon pa OM”.
‘No demokrátiko’
Den un relato na Staten di Kòrsou tokante e kaso Bientu Wilsoe ta kritiká ku e mester a entregá instrukshon na OM tokante e investigashon individual hudisial na wes pa aprobashon. E prosedura aki, ku ta inkorporá den e lei di konsenso di Reino pa Ministerionan Públiko, e mandatario di Pueblo Soberano ta haña ‘no demokrátiko’: “Ministernan hulandes i arubano sí por duna instrukshon direktamente”.
P’esei e minister kurasoleño ‘riba término hopi korto ke bini ku un proposishon di lei pa eliminá e leinan di konsenso di reino ku a drenta na vigor dia 10-10-’10 i ku ta debilitá demokrasia na Kòrsou. Ma ta Wilsoe mes tabata un di esnan ku a firma pa e lei di konsenso di Reino aki dia 9 di sèptèmber 2010. Bosero di Spies, Thijs Manten, den un reakshon korto ta memorá ku “no por kaduká lei di konsenso di reino di un banda so”.
----------------