Boletin di notisia di 15 di mei

Ta violá lei di mucha na Hulanda
Ta kibra ku derecho di mucha na Hulanda. Mas ku mei mion mucha ta víktima di esei. Marc Dullaert, defensor di mucha, ta deklará esei den e promé monitor hulandes di derechonan di mucha. Ta abusá di e muchanan o nan ta biba den pobresa, segun Dullaert. Un di kada 10 mucha na Hulanda ta lanta den un famia ku tin ku sobrebibi ku menos ku 1400 euro pa luna. E kantidat aki ta subiendo. "E muchanan aki ta bira soshalmente isolá", Dullaert ta atvertí
Sindikato di polis ta bai negoshá un biaha mas ku Opstelten
Sindikatonan di kuerpo polisial hulandes ta bai negoshá atrobe ku minister Opstelten pa asina yega na un cao nobo. Nan ta para nan akshonnan pero ta desea di mira resultado na fin di e luna aki. E sindikato i e minister a deklará di tin konfiansa den e negoshantenan ku ta guia e proseso di cao.
Interes pa akshon di Facebook ta keda subi
Interes pa kumpra akshonnan di Facebook ta keda subi, loke a pone e kompania subi preis di e akshonnan. Un akshon ta kosta entre 34 pa 38 dolar. Den anterior e preisnan tabata entre 28 i 35 dollar. Agensianan di prensa Reuters i Bloomberg ta partisipá ku e inskripshonnan tambe ta sera algun dia mas tempran. E balor total di Facebook lo por yega 104 miar di dollar. Ta kere ku lo gana 12 miar di euro si e kompania subi merkado di bolsa. Djaweps awor Facebook lo partisipá e preis definitivo. Djabièrnè Facebook lo subi merkado di bolsa na Wallstreet.
Krisis polítiko a kaba na Haiti
E krisis polítiko ku ta'tin na Haiti a kaba. E krisis a dura tres luna. Ayera parlamentu a aproba plannan di maneho di promé minister Laurent Lamothe. E ke kaba ku pobresa na su pais i bin ku miho protekshon di medio ambiente. E promé minister a pidi henter pueblo pa biba den harmonia i boga pa union pa asina por logra un Haiti èksitoso. Lamothe, ku tabata minister enkargá ku asuntunan di eksterior ta remplasa Garry Conille ku a tuma su retiro na fèbrüari. Nombramentu di e promé minister nobo ta tuma lugá eksaktamentu un aña despues di nombramentu di Michel Martelly.
Elekshon nobo na Gresia
Ta bin elekshon nobo na Gresia. Kombersashonnan pa logra forma un gobièrnu nashonal a frakasá. Ta nuebe dia despues di ku a tene elekshon na e pais. Esei bosero di presidente Karolos Papoulias a konfirmá. Probablemente e elekshonnan ta tuma lugá riba 10 of 17 di yüni. Un gobièrnu temporal lo funshoná té ku e dia ei. E presidente di Gresia a deliberá tres dia ku lidernan polítiko sin logra mashá. Un di e lidernan, e socialista Evangelos Venizelos a bisa ku "nos ta bai urna atrobe denter di algun dia, e situashon ta empereorando".
Hulanda ahinda den reseshon
Ahinda Hulanda no a sali for di reseshon. Ekonomia hulandes a kremp den promé kuartal di aña ku 0.2 porshento, kompará ku e último kuartal di 2011. Ta di tres kuartal ku ekonomia hulandes ta kremp. Ofisina Sentral di Estadístika ta partisipá ku den e promé kuartal di 2012 ekonomia a kremp ku 1.1 porshento kompará ku e mesun periodo den 2011. Invershonnan i konsumo a baha, pero eksportashon a subi si ku 3.8 porshento.
Francios Hollande ta hura komo presidente di Fransia
Francios Hollande a hura komo presidente nobo di Fransia. Den su diskurso Hollande a boga pa unidat den su pais. Tambe el a bisa ku e ta konsiente di e echo ku e ta bai karga un responsabilidat grandi i ku lo bin retonan grandi riba su kaminda. Ta promé bes despeus di 1995 ku un presidente sosialista ta huramentá na Fransia. E seremonia a tuma lugá na palasio Elysée. Hollande a pidi pa tene e seremonia modesto. Awemèrdia e ta sali pa un bishita di trabou na Alemania. E ta bai reuní na Berlin ku kansiyer Merkel.
Nave espasial Sojoez na kaminda pa sentro di espasio internashonal ISS
A dura kasi 7 siman, pero porfin a lansa e nave espasial Sojoez. E nave espasial a sali rumbo pa sentro espasial internashonal ISS. E tim na bordo di Sojoez ta bai kambia warda ku entre otro oustrouta André Kuipers ku ta hospedando for di dezèmber den e base espasial. Awemainta a lansa e rakèt for di e base na Kazachstan. Shete siman pasá a para e lansementu pa motibu di fayonan tèkniko. Djaweps awor e tim di astronouta nobo lo yega na e stashon den espasio. Dia promé di yüli André Kuipers, astronouta hulandes, ta yega planeta tera.
Rotterdam ta rekòrdá bombardeo
Ayera tabata eksaktamente 72 aña pasá ku militarnan aleman a bombardia Rotterdam. Riba 14 di mei 1940 a bombardia i destruí e siudat kompletamente. Alkalde Aboutaleb a pone krans na e monumento "De verwoeste stad", ku ta keda na Plein 1940. Despeus a tene dos minüt di silensio. Promé ku esei Aboutaleb a rekòrda e ultimatum ku e alemannan duna Rotterdam den su diskurso. Tambe ta'tin un debate i un konsierto di konmemorashon. Mas ku 850 suidadano di Rotterdam a fayesé durante e bombardeo. Mas ku 80 mil a keda sin kas.
Suiso ta para landamentu di Suisa pa Hulanda den riu Rijn
Ernst Bromeis, e deportista siuso ku tabata ke landa den riu Rijn di Suisa pa Hulanda, pa kibra rèkort mundial, a para su reto. E ta sigui si ku su biahe pero den un kayak. Despues di un etapa di 10 ora i mei Bromeis a bisa ku tabata un kibukashon pa kere ku e lo por a landa pasa den henter e Rijn. Te ku awor el a landa un distansia di 426 kilometer. E distansia kompleto di Suisa pa Hulanda ta 1230 kilometer. Ku su biahe Bromeis ke pone atenshon riba awa limpi. E ta spera di yega Hoek van Holland riba 31 di mei.
Wer na Hulanda:
Hopi yobida, aki aya ku mal wer i hagel. Temperatura máksimo ta 13 grado. Mañan tambe awa ta kai. Ta mas fresku, temperatura máksimo ta 11 grado.