Polis Kòrsou a detené un fotógrafo di prensa

WILLEMSTAD - Djaluna 14 di mei 2012 durante di e kaso di hinkamentu na e bario De Savaan, Polis a detené tambe un fotógrafo di e kòrant Extra, Jason W.L.A.K. (29).

Durante ku polisnan tabata atendiendo e kaso aki, un agente polisial ku a tuma nota ku tabatin algun fotógrafo di prensa sakando portrèt di e víktima sintá den e ambulans, mester a sera e porta di ambulans.

Riba aktuashon di e agente polisial e fotógrafo J. ku tabata pará na e momentu ei patras di e ambulans,  lo a ekspresá  palabranan ku e funshonario polisial a konsiderá komo insulto di un funshonario polisial. 

En konekshon ku e insulto i no duna oido na òrdu di polis a detené e miembro di prensa J.W.L.A.K.
Hefe di Kuerpo Polisial Interino komisario M. Wernet lo laga hasi un investigashon riba sirkunstansia i kondishonnan  ku a kondusí na e detenshon aki.