Resúmen di korant 22 di mei

Kòrsou ta den publisidat atrobe i lástimamente pa motibu di un notisia tristu. Djasabra un mucha muhé di 22 aña a fayesé despues ku el a haña un desgrasia ora e tabata sambuyá. El a muri pasó no tabata posibel dun'é tratamentu pa e malesa di dekòmpreshon na Kòrsou. Malesa di dekòmpreshon ta ora un persona ku ta sambuyá haña muchu nitrógeno den su sanger dor ku el a subi bai superfisié di laman muchu lihé. Dos luna kaba un tanki di dekòmpreshon nobo ta pará ta warda ta kué stòf. No por huz'é pasó ahinda e luga kaminda mester pone e aparato para no ta kla. A transportá frei di e mucha muhé ku tabatin mesun problema pa Boneiru. Su situashon ta stabil.

Despedida di parlamentario Kathleen Ferrier di Tweede Kamer despues di elekshon na sèptèmber awor ta un notisia ku nos por lesa den kasi tur korant. E matutinonan ta pone énfasis riba e aspekto di resistensha di Ferrier kontra koperashon ku PVV. De Telegraaf i de Volkskrant ta skibí tambe ku el a indiká seka e negoshadónan di e akuerdo di Catshuis ku hamas i nunka e lo a bia diakuerdo ku ekonomisashonnan riba ayudo pa desaroyo.

Dos kandidato deskonsertá ta lucha kontra otro pa bira lider di un partido deskonsertá. Asina AD ta tipifiká e promé debate di GroenLinks na Amsterdam. Jolande Sap i Tofik Dibi a purba drecha imáhen di partido despues di un siman ku hopi fastioso. E intenshon di e dos kandidatonan tabata pa uní e kamponan den partido atrobe, pero AD a ripará tambe kon Dibi i Sap tabata hinka palu bou'i kandela pa otro. Segun AD Sap no a laga niun momentu pas'é vorbei pa e bisa ku kurashi so no ta sufisiente. Dibi a duna di konose ku e ke stimulá kreatividat di frakshon, algu ku segun AD ta un ataké direkto riba Sap.

Hulanda a reglá demokrasia bon, pero un kos falta ahinda: Involvimentu di suidadanonan, asina Trouw ta skibí. Ta pesei suidadano, desaroyadó di maneho i polítikonan mester krea un modelo ku ta sali for di e punto di bista di e suidadano. Esaki ta e mensahe kardinal di e rapòrt 'Konfiansa den suidadano', di e organo di konseho sientífiko pa maneho di gobièrnu.

Pa laga suidadano sinti'é envolví, gobièrnu mester tene kuenta ku su perspektiva. Suidadanonan tin tur sort'i nesesidat i kalidat. Si no tene sufisiente kuenta ku esakinan, hopi hende lo legumai, segun e rapòrt. E rapòrt ta dirihí riba gobièrnunan munisipal, organisashonnan soshal i polítikonan na Den Haag. Awe e órgano di konseho ta presentá su rapòrt na promé minister demisionario Mark Rutte.

E selekshon di klup di futbòl Vitesse ta un siman di bishita na Sürnam, mientras entrenadó John van de Brom no ta sigur ahinda di su futuro, asina De Telegraaf ta skibí. Wikènt k'a pasa e klup a klasifiká pa futbol oropeo i e hungadónan ke pa van de Brom keda. E entrenadó mes ke bai traha pa e klup belgikano Anderlecht, pero a alargá su kontrato outomátikamente te 2014. Pero e siman akí e treiner i e hungadónan ta konsentrá nan mes en todo kaso riba e Kopa di Parbo i un trep den selva di Sürnam.

Sektor di arte na Hulanda ta haña sla atrobe, asina nrc.next ta skibí. Ayera e órgano di konseho pa sektor di arte i kultura a presentá su plan tokante repartishon di supsidio di gobièrnu. Un di e institutonan ku ta pèrdè hopi supsidio ta Rijksmuseum na Amsterdam. Manera e korant ta skibí ta parse manera sektor di arte ta haña straf dos be.

Promé tabatin e ekonomisashonnan di 200 mion di euro ku gobièrnu a stipulá pa e sektor. I awor tin krítika riba e petishonnan pa supsidio di e diferente institutonan. E institutonan lo a pone pronóstikonan hopi haltu i irealístiko. E konseho tin ku hari ora e lesa e kantidat di bishitante ku e institutonan ta spera di atrahé.

Minister di imigrashon, integrashon i asilo Gerd Leers ke kambia e prosedura pa atmishon di pididónan di asilo. E ke aselerá i hasi e porsedura mas severo. Asina e ta bisa den un entrevista ku de Volkskrant. Segun titular di e korant pa abogadonan esaki ta e di tantísimo fantasia di minister Leers. E minister ke pa for di promé be ku un persona entregá un petishon pa asilo, pa tene kuenta mes ora ku tur su sirkumstanshanan privá. Manera situashon di famia i su estado médiko.