Resúmen di korant hulandes di 24 di mei

Resúmen di korant hulandes di 24 di mei
Sürnam a kai for di grasia, asina De Telegraaf ta titulá den un notisia chikitu. Kolegio di alkalde i diputado di Amsterdam a disidí ayera di no start proyekto humanitario nobo mas na Sürnam. Motibu ta e pasamentu di e lei di amnestia. Aktualmente Amsterdam tin ocho proyekto ta kore ainda na Sürnam.
E kumbre informal na Brùsel ta sali den kasi tur matutino. Het Financieel Dagblad ta skibi ku ayera tabatin notisia nobo alarmante tokante eskalashon di e krísis di debe den zona euro. Merkadonan di akshon i di euro a haña nan bou di mas preshon.
De Volkskrant ta titulá: “Spaña na rant di presipisio.” Pasobra e pais no por paga su debenan mas sin sosten finansiero di Oropa. Djis promé ku e kumbre informal a kuminsá promé minister spaño a subi preshon ku un gritu di ouksilio pa e interes haltu ku su pais ta paga. Segun Trouw e divishon interno durante e komementu na Brùsel tabata parse muchu grandi pa por yega na un plan komun pa kresementu.
Mas i mas mucha chikí ta haña nan na hòspital ku leshon serio, despues di un aksidente den kas, asina AD ta skibi. Mayornan no ta sufisientemente konsiente di peligernan ku por tin den kas. Tur aña 23 mil beibi i mucha chikí ta bini poli ku leshon ku nan a haña na kas. Segun Veiligheid.nl (un organisashon di konsumidó i seguridat) e kantidat di aksidente ku leshon serio entre 2006 i 2010 a subi ku 48 porshento. P’esei e organisashon ta masha prekupá.
Den futuro no ta keda sinta mas na skol sekundario, asina De Telegraaf ta skibi. Den e aña di skol ku ta bini e promé skolnan ta bai partisipá na un tèst pa no laga alumno ku mal sifra di rapòrt keda sinta. Tur hende mester bai ofer.
Alumno ku presta malu durante e aña di skol lo haña guia intensivo. Ku esaki gobièrnu lo spar 350 mion euro pa aña i ta trese ménos frustrashon seka dosente i alumno E plan ta bini di bònt di enseñansa di CNV. Segun e bònt mester skohe skolnan ku ta bai partisipá na e eksperimentu mas lihé posibel.
Inspekshon di salú a kita kuater kuidadó di hende grandi di edat despues di un keho di maltrato severo di ansiano. Ku esaki Het Nederlandse Dagblad ta habri. E korant ta basa su mes riba un karta ku sekretario di estado demishonario di Salubridat Públiko Veldhuijzen van Zanten a manda pa parlamento djamars.
Den mei aña inspekshon a haña kasi 170 aviso di maltrato di ansiano. Den ocho kaso tabatin prueba irefutabel. Kuater instansha di kuido a kita e maltratadó.
Tabata espesialmente yunan di e habitantenan di kas di kuido i kas di ansiano ku tabata duna keho ku e kuidadónan tabata intimidá, dal, kinipí mara, hòrta, neglishá òf abusá seksualmente di e ansianonan.