Kámara di Akountent ta duna Goede rason den kaso Hernández
WILLEMSTAD – Den kaso di e keho ku Miguel Goede a hasi kontra Terry Hernández na Kámara di Akountent, e èks rèktòr di Universidat di Antia (UNA) a haña rason.
A husga ku lo suspendé akountent i investigadó di froude Terry Hernández pa seis luna di registro di akountent. Pa seis luna e no por traha komo akountent di registro. Esaki Goede su abogado Karel Frielink a laga sa.
Akusashon
Goede a entregá un keho kontra Hernández pa motibu di su rapòrt. Eiden Hèrnandes a ekspresá akusashon severo na Goede. Inhustamente, segun konseho disiplinario di AC.
AC ta tilda Hèrnandez ku den su investigashon e no a tende profesor Roel in ‘t Veld. Esaki tabata un testigu importante di Goede, pero Hernández no a haña nesesario pa inkluyé den e investigashon.
Tambe AC ta bisa ku e akusashon ku Goede ker a saka plaka di UNA ku dokumento falsu no ta klòp.
AC ta haña ku Hernández mester a realisá kon dañino su rapòrt lo por a resultá pa Goede. “E no a tene sufisiente konsiderashon ku interes di e kehadó. Asina el a aktuá kontra prinsipionan fundamental di ophetividat i kondukta profeshonal”, segun konseho disiplinario.
Retiro imediato
UNA tempunan ayá a usa e rapòrt ku aparentemente no tabata sirbi pa duna Goede retiro imediato, abogado Frielink ta bisa. Goede a bringa e retiro dilanti wes.
Den e kaso di retiro Goede a trese dilanti ku nunka UNA no por a usa e akusashonnan di Hernández komo base di su retiro. Esaki segun Frielink a keda konfirmá pa e wisio di Kámara di Akountent. Wes mester sentensiá dia 5 di yüni den e kaso di retiro.