Gobernador i gobièrnu tin pleitu pa motibu di Kranshi
A harma un guera formal tokante mudamentu di Kranshi, Registro Sivil di Kòrsou. Den un karta urgente na minister Carlos Monk di Maneho, Planifikashon i Servisio gobernador Frits Goedgedrag a kritiká e ‘proseso di desishon’ rònt di e mudamentu aki. El a pidi gobièrnu pa un splikashon por eskrito promé ku 23 di mei último. No ta konosí si a duna e splikashon aki.
Den un karta di 15 di mei Goedgedrag ta tuma nota di e desishon ku Konseho di Minister a tuma pa sera un akuerdo di hür entre Pais Kòrsou i abogado Marius Römer ku ta representá St. Thomas College/Fundashon St. Thomas, ku ta doño di e edifisio ku ta bai hür.
Renobashon
Kranshi lo mester muda di Breedestraat Otrobanda pa e edifisio ku antes tabata St. Thomascollege na L.B. Smithplein. Último simannan tabatin masha krítika riba e plan di mudansa aki. E hürdónan aktual, e skol di akrobat i fundashon Danzarte, a bati alarm ora - sin anunsio delantá – kontratista tabata pará na L.B. Smithplein pa renobá e skol. Aktualmente a pone e trabounan di konstrukshon ‘on hold’.
[related-articles]Tres organisashon di interes na Otrobanda tambe a indiká ku e motibu di e mudamentu planeá di Kranshi ta un misterio pa nan. Nan ta duda si pa Registro Sivil e lokashon lo sali asina mas barata. Presensha di Kranshi den kaya grandi di Otrobanda ta parse nan mihó tambe pa siudadano i pa komersiantenan lokal.
Goedgedrag ta hasi pregunta tokante e hür haltu di e edifisio nobo; esaki ta 125 mil florin pa luna. No tin palabrashon pa kuminsá hür pa despues kumpra e edifisio. Esaki ta “kontradesí loke promé minister a bisa mi”, Goedgedrag ta skibi.
Entrega di pasport
Den e karta Goedgedrag ta mustra Monk tambe riba e interes di e prosedura i manera di anda den entrega di pasport: “Naturalmente pa un sistema di entrega di pasport korekto i òrdènt, ta di suma importansha ku e organisahon i seguridat di e lokashon, i e proseduranan den e organisashon, ta di e nivel di mas haltu posibel.”
Gobernador ta pidi atenshon pa e retraso grandi ku tin den entrega di léges di pasport na Ministerio di Asuntunan Interior i Relashonnan den Reino. Gabinete di gobernador ta adelantá e léges, pero for di sèptèmber di aña pasá Kranshi no a paga i awo ta debe sigur 411 mil florin. Goedgedrag ke pa riba término korto paga e plaka aki bèk.