Godett: ‘Apresio pa lucha di 30 di mei ta bira ménos’

“Pueblo di Kòrsou i partikularmente sindikalismo ta ménos konsiente di e importansha di 30 di mei 1969. E apresio ta baha pa e marcha históriko pa rasonabilidat sosial ekonómiko.” Esaki ta opinion di miembro di Staten Anthony Godett. E ta lider di e partido polítiko Frente Obrero Liberashon 30 di mei (FOL) í di Fundashon Wilson (Papa) Godett.
“Kon ta posibel ku un plenchi yamá pa e pionero di sindikato Reggie Venlo ta asina mal mantené?”Godett no ta haña e argumento di mundu di sindikato ku ‘despues di 21 aña no tin plaka mas pa mantené plenchi’ balido. “Ta pesei FOL mes, riba djasabra 2 di yüni ta bai limpia i dòrna e plenchi aki.”
Inkulká
Godet no ta boga pa ‘un 30 di mei nobo’ òf ni sikiera ‘un revolushon mental’pa kombatí e defisiensianan sosial ekonómiko di aña 2012. “Revolushon ta un palabra grandi pero un konsientisashon sí mester tuma lugá. E motibunan i resultadonan di 30 di mei 1969 mester inkulká seka mucha for di den enseñansa di fundeshi. Bo mester ta na altura di welga di 1922, hañamentu di Statüt na 1954 i e marcha di 30 di mei 1969. Ta trata di nos proseso di emansipashon i lucha pa nos libertat.”
Si ta na e miembro di Staten di FOL, kada habitante di Kòrsou sa tambe kiko ta e liñanan mas importante i e personanan di un lucha lokal di obrero. I ku ”FOL ta e úniko partido den e pais ku no a lanta den un ofisina ku èrko di un notario, pero riba kaya, den kayente di lucha.”
Programa
Djaluna 30 di mei 2012 FOL ta sigui un programa ku ponementu di krans na tumba di entre otro Wilson ‘Papa’ Godett i Amador Nita. For di sink’or di atardi lo selebra e di 43 aniversario di ’30 di mei’ huntu ku gobièrnu dilanti pòstkantor na Punda. For di och’or djanochi tin un evento di bòkseo – Papa Godett tabata bòksdó – na e edifisio di partido di FOL.