Boletin di notisia djabièrnè 1 di yüni

CDA ta é partido di famia. Asina tin skibi den e programa di elekshon di e partido ku tin komo título 'Tur hende'. CDA ta skohé pa un presupuesto balansá na 2017. Ademas e partido ke yuda esnan ku kumpra nan promé kas ku un areglo fiskal. Ta bai bin un bonùs tambe pa esnan ku amortisá nan hipotek mas lihé. CDA ke baha e gastunan di famianan, prinsipalmente esnan ku tin yu chiki. Ta ampliá e vèrlòf pa muhé na estado i mama ku a duna lus i tata ku ke soru un tempu pa nan beibi. CDA ke redusí e suma ku studiante mester paga pa estudionan tékniko i estudio pa bira dosente. E último aki speshlamente pa e materianan ku tin skarsedat di dosente. Kongreso di CDA mester aprobá e programa di elekshon ahinda.

No genosidio pero un krímen serio
Asesinato di mas ku ocho mil hòmber musulman na Srebrenica segun presidente Nikolic di Servia no ta genosidio. E presidente nobo a tene un diskurso na telebishon na Montenegro a bisa si ku ta trata di un delitu hopi serio, kometé pa un par di serbo ku mester haña kastigu pa esaki. Na verano di 1995 trupanan serbo bou di liderasko di general Mladic, a mata ocho mil hòmber i hóben maskulino musulman.

Funshonario haltu detené na China sospecha di spionahe
China a detené un funshonario haltu di ministerio di Seguridat sospechá di spionahe pa Estados Unidos. Asina e agensha di prensa Reuters ta informá a base di fuentenan anónimo. Pa añanan largu e hòmber lo a pasa informashon polítiko, ekonómiko i stratégiko pa merikanonan.

Edwards no mester bai prizòn
Eks kandidato presidenshal merikano John Edwards no tin nodi bai prizòn. Tabata sospechá e kandidato pa partido Demokrátiko di a mal uzá plaka di kampania. Pero hurado den e kaso kontra Edwards no por a yega na un konklushon unánime si Edwards ta kulpabel si òf nò. Ta pesei wes a seponé e kaso. Na 2008 John Edwards a hasi un intento pa drenta Kas Blanku. Durante su kampania Edwards, kende tabata kasa, a hañ'é konfrontá ku rumornan tokante un relashon ku un miembro di su tim di kampania. Den kuminsamentu el a desmentí e rumornan, pero despues el a atmití. Aña pasa a kuminsa un kaso kontra Edwards pasó el lo a huza plaka di kampania pa tene su relashon sekreto i el a paga su kolaboradonan pa nan gaña tokante su relashon.

Hòmber ta kome kurason i sesu di víktima
Na Baltimore den e parti ost di Estados Unidos un hòmber di 21 aña a mata su kompañèro di kas i despues komé su kurason i un parti di su sesunan. E hòmber a skondé e kabes i e mannan di e víktima den kèlder di kas di su mayornan. E mayornan tabata huza e kèlder komo washòk. Ruman hòmber di e malechor a deskubrí e miembronan di kurpa di e víktima. E sospechoso a atmití i el a bisa ku el a skondé resto di e kurpa den un kònteiner di tira sushi band'i un misa. Ei a deskubrí e restonan.

Desempleo a krese na Estados Unidos
Merkado laboral merikano a desaroyá su mes muchu menos bon luna pasá kompará ku loke nan a spera. Desempleo a subi di 8.1 te 8.2 porshentu di poblashon aktivo. Outoridatnan a kere ku desempleo lo a stabilisá. Un ke otro a sali na kla for di sifranan nobo di ministerio di labor merikano. Prinsipalmente e kantidat di kupo di trabou nobo ta laga di deseá.

14 morto na base merikano na Afganistan
Un atentado di bòm riba un base di ehersito merikano na Afganistan a okashoná morto di sigur 14 persona. Asina funshonarionan di trupanan internashonal ISAF ta informá. Un trùk kargá ku eksplosivo a kore drenta e base Salerno. Taliban a bisa ku nan ta responsabel pa e atentado. Segun Taliban nan a mata un kantidat grandi di militar estranhero. Un bosero di ISAF ta desmentí esaki. Segun e bosero e víktimanan tabata afgano ku tabata traha na e base merikano.
 
ChristenUnie ke dividí zona di euro
ChristenUnie ta laga investiga si ta posibel pa dividí zona di euro den un parti nort i un parti sur. Asina lider di partido Arie Slob a bisa den e programa di telebishon Knevel en Van den Brink.  Slob tin miedu ku no tin sentido pa siguí e kaminda aktual pasó esaki no ta funshoná. "E respaldo demokrátiko pa e aktual manera di atendé e asuntu ta birando dia pa dia menos. Nos ke mira si tin un otro solushon." ChristenUnie a aserká profèsor Graafland di Universidat di Tilburg pa hasi e investigashon. Slob ta spera ku esaki ta kla djis despues di verano.

Wilders a pèrdè kaso kontra gobièrnu
Geert Wilders a pèrdè e kaso ku el a entamá kontra estado hulandes. E lider di PVV kera evitá ku Hulanda ta bai diakuerdo awor kaba ku e fondo di emergensha pa euro. E tabata ke pa Hulanda tuma un desishon despues di elekshon,  ku ta tuma luga 12 di sèptèmber. Wes na Den Haag ta rechasá e eksigenshanan di Wilders. Wes ta haña ku Wilders no por intervení den e proseso di legislashon di parlamentu i gobièrnu. Tweede Kamer a aprobá kaba un kontribushon di 4.5 miar di euro di Hulanda den e fondo di emergensha pa euro.

Hulandes ta fia muchu
Mitar di tur famia hulandes tin un fiansa. Esaki ta mas tantu ku tres aña pasá. E temp'ei un tersera parti tabata tin un fiansa. Asina a sali na kla for di investigashon di NiBud, e instituto nashonal pa informashon tokante budgèt. E instituto no a tene kuenta ku hipotek ni défisit riba kuenta di banko den su investigashon. NiBud ta prekupá si pa e kantidat di fiansa kresiente. E instituto ta bisa ku kultura di fiá plaka ta alarmante. Suidadanonan no ta realisá nan mes sufisientemente kiko e impakto di un fiansa riba nan gastunan mensual.

Van Vollehoven kera bira prens
Pieter van Vollehoven, kasa di prinsesa Margriet kera bira prínsipe. Asina e historiadó Wilfred Scholten ta skibi den e biografia 'Mooie Barend' tokante e polítiko hulandes Barend Biesheuvel. Dia 15 di mart 1966 Van Vollehoven tabatin un kòmbersashon ku Biesheuvel, vise promé minister e temp'ei. Durante e kòmbersashon Van Vollehoven a puntra Biesheuvel si e por bira prens, meskos ku Claus a bira prens despues ku el a kasa ku Beatris. Van Vollehoven tabata súmamente asombrá ku e no a haña e título pero su yunan si. E mes semper a desmentí ku e lo a pidi pa e bira prens.

Pronóstiko di tempu na Hulanda:
Awetardi ta poko nublá pero tin un poko solo tambe. Tin chèns riba áwaseru. E temperatura ta 14 grado den e parti nort i 17 di e parti sur.