‘Plan Nashonal pa mengua violensia doméstiko’

“Semper tabatin violensia doméstiko na Kòrsou, pero awor e ta haña mas atenshon i e frekuensia di insidentenan ta mas haltu tambe.” Asina e eksperto eksperiensiá riba tereno di derechinan humano i di hende muhé en partikular, Jeanne Henriquez, ta bisa.

Henriquez su organisashon Dedima ta forma parti di e Aliansa ku djestres entidat ku ta aktivo riba tereno di bienestar sosial a forma. E Aliansa a reuní ku kuater minister i profeshonalnan den vários ária pa pone e base pa un Plan Nashona Kontra Violensia Doméstiko i Abuzu di Mucha.

Edukashon
Alex Wallé, di e organisashon Yave, ta di akuerdo ku Henriquez ku un plan nashonal ta nesesario pa atendé e problemátika akí. “Informashon i edukashon ta nesesario pa agresor, víktima, profeshonalnan ku tin di haber ku e problema akí i pueblo en general siña hasi mihó eskoho pa evita òf minimalisá e tipo di violensia akí.”

“Un mira mas balansá riba ròl di hòmber i muhé den un relashon íntimo ta evitá pensamentu ku ta promové maltrato. Tambe un hoben por posponé sierto aktividat di plaser pasobra e tin un meta ku e ke alkansá promé den bida”, Henriquez ta añadí.