A manda prueba nobo den asesinato Castro Hulanda

ORANJESTAD – Fiskal di Aruba a envolví Nederlands Forensisch Instituut (NFI) den e kaso di e asesinato di Poentje Castro. Segun Ministerio Públiko (OM) tin prueba nobo ku mester investigá forénsikamente. No ta bisa ki sorto di prueba, asina e korant Amigoe ta skibi.
Dia 23 di desèmber 2010 a haña presentadó di televishon i reportero investigadó Poentje Castro morto den su kura di kas. For di outopsia a bin sali ku e anochi promé a tira Castro ku dos bala. Te awó no a aresta niun hende.
[related-articles]Otro prueba
Segun bosero Ann Angela di OM awor ta trata di otro prueba ku e Blackberry di e periodista asesina, ku tambe a manda afo. Fiskal ta ferwagt resultado di e investigashon den tres luna.
Ounke e prueba ta den poseshon di OM algun tempu kaba, a dura hopi tempu promé ku a mand’é NFI. “Nos tabatin mester di tempu pa pon’é den un kuadro hurídiko (haña legislashon ku ta aplikabel, red.), pa por mira kiko tabata posibel téknikamente pa formulá e pregunta di investigashon”, segun Angela.
Ademas e bosero a deklará ku e prueba a bin sali durante e investigashon koriente. “Ta te mas despues a bira kla ku e prueba aki mester di mas investigashon.”