Minister Spies ta bishitá parti karibense di Reino

DEN HAAG – Minister Liesbeth Spies (Asuntunan Interior i Relashonnan den Reino) djárason 13 di yüni lo bishitá Kòrsou. Prome ku esaki e lo bishitá Sint Maarten, Saba i Sint Eustatius.
E bishita na Kòrsou ta relashoná ku problema ku presupuesto di gobièrnu Schotte i e intervenshon di minister di hustisia Elmer Wilsoe den e kaso penal spesífiko kontra Dos Santos. Den un kontesta riba pregunta den parlamentu Spies alaga sa kaba ku e ta haña e asuntu rònt di e karta na Hillary Clinton ‘konfundí’.
Presupuesto
E bishita di Spies na Sint Maarten ta start djadumingu dies di yüni. Durante e bishita Spies lo papia tokante e problemanan rònt di presupuesto ku minister di Finansa Roland Tuitt. Tambe Spies a reservá tempu pa papia ku minister di Hustisia Roland Duncan tokante e rapòrt di Voortgangscommissie i e plannan di enfoke pa lanta institushon nobo pa e pais.
Spies ta probecha di e bishita pa sera konosí ku e gabinete nobo di Sint Maarten i tene deliberashon ministerial ku Sarah Wescot-Williams.
Djamars meinta lo tene e deliberashon di kada mei aña di minister di Asuntunan Interno i Relashonnan den Reino i gobernadornan di Aruba, Kòrsou i Sint Maarten. Spies tin un enkuentro separá tambe ku gobernador di Sint Maarten, Eugene Holiday.
Sigui bula
Despues di Sint Maarten e ta sigui bula bai Saba i Sint Eustatius pa deliberá ku e bestuurscollegenan di e dos islanan.
Despues ku e yega Kòrsou e minister lo deliberá ku gobernador Goedgedrag. Djaweps 14 di yüni lo e topa promé minister Schotte i gobièrnu di Kòrsou.