Talento nobo Balootje ta mira Ortega-Martijn komo ehèmpel

ChristenUnie ta preferá hopi talento nobo pa elekshon di miembronan di Tweede Kamer dia 12 di sèptèmber awó. Un di nan ta Ixora Balootje di 23 aña di edat. E ta di desendensha sürnam-kurasoleño i e ta presidente di frakshon di SGP-ChristenUnie den konseho di bario Prins Alexander na Rotterdam. "Un talento eksepshonal", asina lider di partido Arie Slob ta bisa di dje.

Su mama ta sürnam anto su tata ta yu'i Kòrsou. "Esei a hasími un nèchi mix", asina e mes ta bisa di su bèkgrount. E rango haltu ku e tin riba kònsèpt di lista di kandidato a sorprend'é. Balootje mes a solisitá p'un puesto riba e lista ei, ma e no a ferwagt ku nan lo a kolok'é dje haltu ei.

Modelo ehemplar
Balootje ta mira e aktual miembro di Tweede Kamer, Cynthia Ortega-Martijn komo modelo ehemplar i pionero. "E ta di desendensha kurasoleño i t'e a sòru pa mas persona multikultural sinti nan na kas den e partido." E ta bisa ku el a siña hopi di Ortega-Martijn, tambe pa motibu ku el a hasi esfuerso p'e masterclass eksitoso pa talento multikultural den seno di ChristenUnie.[related-articles]

Miembro i simpatisantenan dje partido ta kere ku Ortega-Martijn lo hasi falta awor ku e no ta regresá Tweede Kamer. Ma segun Balootje, e parlamentario saliente por nifiká hopi ainda pa e hendenan na Antia. "Por kontinuá ku e loke el a logra." Balootje lo hasi su bèst pa supstansiá herensha polítiko di e parlamentario saliente.

Hiba kampaña
E puesto number 9 riba e lista di kandidato provisorio no ta parse di tin hopi chèns pa logra un asiento den e parlamentu hulandes nobo eligí. Balootje no ta wòri mashá k'esei. "Ta importante pa tur hende bai vota, i sigur esnan ku un bèkgrount karibense." Esei por yud'é drenta Kamer ku voto di preferensha, pero no ta kos ku e ta duna atenshon spesial n'e. "Mi ta hasi mi máksimo esfuerso p'e kampaña." Por lo demas e ta warda wak ki ta pasa.