Hobennan di Band’Ariba ta riba bon kaminda

Hopi hóben di Band’Ariba na Kòrsou ke hasi kos útil den nan tempu liber i no kana pòrnada riba kaya. Na fundashon ‘Un Bon Hóben pa un Bon Famia’ e hóbennan ta traha na un proyekto atraktivo. Direktor Majron Maduro ta masha envolví den desaroyo di bario di Band’Ariba ku fókùs riba hubentut.
E Parada ta bini di Band’Ariba
Majron Maduro (32) ántes tabata mucha di internat. Aktualmente e ta traha na e internat di mucha hòmber ‘Kinderoord Brakkeput’. E ta ganadó di diferente premio di stimulashon pa su trabou ku hubentut i bario di Band’Ariba.
Edifisio multifunshonal
Fundashon ‘Un Bon Hoben pa un Bon Famia’ ta doño di un bon pida tereno na Seru Grandi. Ei den futuro mester bini un edifisio multifunshonal kombina ku mas o ménos dies apartamento, un vèlt di rekreashon i pida tereno pa plantashon. Gobièrnu di Kòrsou ta stimulá proyekto di bario ku ta kontribuí na desaroyo di habitante di bario via nan “Plan Nashonal pa Desaroyo di Bario’. E proyekto na Seru Grandi ta masha nesesario pa hóbennan di Band’Ariba, Majron Maduro ta bisa. “E hóbennan aki mester di atenshon positivo. Nan mester por topa otro den un sentro kaminda nan ta sinti nan mes trankil.”
Kasi 100 hóben di bario aktualmente ta usando Maduro su kas, ku ta sirbi komo sentro di bario. E hóbennan ta hasi diferente aktividat deportivo, ta forma parti di un brassband, ta baila den grupo di seú i ta manehá e plantashon. Tambe nan ta tene kombersashon den grupo bou di guia di Maduro. Esaki ta bon pa nan desaroyo personal.
E edifisio multifunshonal nobo no ta solamente pa e hóbennan aki, sino tambe pa e mucha hòmbernan di e internat Kinderoord Brakkeput. Despues di konstrukshon di e apartamentunan algun hóben, bou di guia por bai biba einan independientemente. Direktor Godalys Reina di Kinderoord Brakkeput ta entusiasmá. “Asina nan ta siña abilidat ku nan tin mester den komunidat den futuro.
Kònteiner
Riba e tereno bashí di e fundashon tin un kònteiner bashí, ku tambe ta forma parti di e proyekto grandi di ‘Un Bon Hoben pa un Bon Famia’. Mester remodelá e kònteiner kompletamente pa e bira un kiosk. Esaki lo bai sirbi komo lugá di bende kos i lugá di trabou pa algun hóben di Band’Ariba ku aktualmente ta siguiendo un kurso di empresariado. E proyekto di konteiner ta bai forma parti di un koperashon. Esaki mester generá plaka pa e fundashon i ta bai paga e salarionan di e empresarionan hóben. E kònteiner ta haña bentana, flur, awa i koriente. Maduro: “Gastunan pa renobashon di e konteiner ta 42 mil florin. Mester di finansadó pa e plaka aki.”