Sineasta Oduber: ‘Mundu di sine arubano porfin ta bai dilanti’
E di tres edishon di Aruba International Film Festival (AIFF) lo tuma lugá di 22 pa 28 di yüni na Aruba. E aña aki ‘Caribbean Spotlight Series’ lo hunga un papel importante. Ta un selekshon speshal di 25 sine i dokumentario trahá pa sineasta talentá di Karibe. E artista i direktor arubano Ryan Oduber ta un di nan.
“Aña pasá por a mira dos sine arubano na e festival. Na tur dos mi tambe a traha. E aña aki mi a konta sigur binti. Porfin mundu di sine arubano ta bai dilanti.”Oduber ta orguyoso. Despues di añanan di trabou di pionero e no ta e úniko mas ku na Aruba ta serio den trahamentu di sine. “Aparentemente tabatin mas hende hóben talentá riba e isla. Awor ku AIFF ta ofresé nan un podio nan ta traha mas i mas sine.”
Artístiko
‘Awa Brak’ i ‘Kima Momo 58’ ta dos sine kòrtiku di man di Oduber ku lo pasa djasabra i djadumingu na e festival. ‘Awa Brak’ ta trata di un mucha muhé rubiano ku ta karga un peso di den pasado kuné i ku no sa kon e dil ku esaki. Oduber a traha e sine huntu ku Francisco Pardo. ‘Kima Momo 58’ el a traha su so. E sine ta menos narativo pero mas pa mira komo un proyekto di arte. “Ta potrètnan di un muhé ku 3500 payèt riba su kara i pechu i ku ta karga un yu di porselana. Ta trata di machismo i e papel ku hende muhé ta hunga den nos komunidat.”
Bunitesa di Aruba
Oduber su sinenan ta pertenesé na e kompetishon speshal di ‘Aruban Flavor’ ku ta trata di e mihó sinenan kòrtiku arubano. “Tin un premio di hurado i un di públiko”, direktor di Caribbean Spotlight Series Aaron Hosé ta konta. “Ku un premio di plaka, un sertifikado i un trofeo speshal nos ta trata di stimulá sineasta arubano èkstra. E isla ta ekselente pa traha sine bunita di dje.”
Sineasta Oduber ta kompletamente di akuerdo. “Aruba ta hunga un papel grandi den mi obranan. Si bo keda largu riba e isla bo no ta mira su bunitesa mas. Pa motibu di mi tempu na Hulanda tin be mi ta wak kos un otro manera.”
Redusí proyekto
E úniko problema di sineasta riba e isla segun Oduber ta e falta di fondo. “Na Hulanda ta difísil kaba pero aki ta pió. Kasi kada proyekto grandi ku mi kuminsá na final mi mester redusí kompletamente pa mi por finansi’é. Si esaki kambia den futuro Aruba por spera un futuro grandioso riba tereno di sine.”