Boletin di notisia di 20 di yüni

Gresia tin gobièrnu nobo
Lider di partido Pasok, Venizelos, a partisipá ku Gresia tin un gobièrnu nobo. Ahinda mester kaba di skibi e detayenan, el a bisa. Esei lo sosodé awenochi. Su partido sosialista, partido konservativo Demokrasia Nobo i un partido chikí Demokrasia Iskierdista ta bai forma e gobièrnu. E último partido lo no haña minister pero ta sostené e gobièrnu sí. Posiblemente lider konservativo Samaras lo bira e promé minister nobo di Gresia.
Agente di Rotterdam tin mag di keda traha durante investigashon
E agente polisial di Rotterdam ku a firma na momentu ku e ta skòp un sospechoso diferente biaha tin mag di kada traha. Su otro kolega ku a para wak e suseso tambe ta keda den su funshon. Esei kuerpo polisial di Rotterdam-Rijnmond a partisipá. A interogá e dos agentenan pero ahinda no sa kiko ta e motibu ku nan a aktua di e manera ei. Lo ta trata di deklarashonnan kontradiktorio. E dos agentenan ta keda efektua nan trabou durante investigashon di e kaso, asina kuerpo polisial a bisa. E víktima mes no a hiba denunsia. Un hende ku a kana pasa mira e suseso a firm'é i pone riba enternèt.
Obama tin konfiansa den Union Oropeo
Presidente di Merka, Barack Obama, tin tur konfiansa ku lidernan oropeo lo logra kaba ku e krísis ekonómiko. El a enfatisá na final di e kumbre G-20 ku e krísis lo no pasa di un dia pa otro. Oropa ta na kaminda pa un integrashon grandi i no di un kiebro, segun Obama. E kumbre di G-20 a tuma lugá na Mèxico. Ta para den e deklarashon final di G-20 ku lidernan di henter mundu ta di akuerdo pa tuma e pasonan nesesario pa protehé e zona di euro. Ekonomianan kresiente manera Brazil, Rusia i China lo depositá mas sèn den e fondo di krísis di IMF. E Fondo Monetario Interashonal awor ta disponé di mas o menos 360 miar di euro pa atendé ku e krísis.
Fundadó di Wikileaks Julian Assange ta pidi asilo pa Ecuador
Ecuador ta reuniendo riba e petishon di asilo di fundadó di Wikileaks, Julian Assange. Esei minister di asuntunan di eksterior a deklará. Ayera Assange a hui drenta embahada di Ecuador na Londen i a pidi asilo polítiko. Di e manera aki e ke evitá ku ta ekstradit'é pa Suesia. Ta akus'é di a viola dos hende muhé. Assange ta desmentí tur akusashon i ta teme ku Suesia lo deporté pa Merka. Estados Unidos ta bisa ku Assange ta responsabel pa públikashon di miles di dokumentonan sekreto di gobièrnu merikano.
Kumbre di medio ambiente ta kuminsá na Brazil
Awe e kumbre di medio ambiente ta kuminsá na Brazil. 20 aña pasá tambe Rio de Janeiro tabata sede di e konferensia. E tempu ei a yega na palabrashonnan desisivo pa loke ta trata kambio di klima, sobre peska i desertísashon. E aña aki esaki lo no ta e kaso. Ku malagana Oropa a bai di akuerdo pa firma un akuerdo di un konsepto di un teksto den kua no tin ningun palabrashon konkreto. E teksto ta tokante kombatimentu di pobresa. Kasi no ta trata otro tópikonan tokante durabilidat. Presidente di Sürnam, Desi Bouterse, pa motibu di salú no por ta presente na e kumbre.
Jetta Klijnsma number dos riba lista di PvdA
Jetta Klijnsma ta number dos riba lista di partido PvdA, lista ku e partido ta bai partisipá kune na elekshon di sèptèmber. Bosero finansiero Ronald Plasterk ta number tres riba e lista. Historiadó Maarten van Rossum ta sera e lista. Ta trata di un lista no definitivo, segun fuentenan di notisiero NOS. Kabes di lista, Diederik Samsom ta number 1. Na kuminsamentu di aña el a haña mayoria voto durante elekshon interno di su partido pa skohe un lider nobo. Awe ta presentá e lista na direktiva di e partido i mañan presentashon ofishal lo tuma lugá.
Ta bai bini kambio den pago di alimentashon
E areglo hulandes di pago di alimentashon lo tin ku bai kambia, segun VVD, PvdA i D66. Awe e partidonan ta bini ku un proposishon di lei pa asina e areglo bira mas simpel i hustu. Tambe ta asina ku eks partner ta haña menos sèn i e periodo di pago ta bira mas kòrtiku. Despues di un divorsio e èks partner lo mester para lo mas pronto posibel riba su mes pia. Segun e proposishon pago di alementashon ta un pago temporal te ku dia e èks haña su mes trabou. Esnan ku ta kasá menos ku tres aña lo no bin na remarke pa haña alimentashon. E kambio aki ta konta solamente pa èksnan, mayornan semper mester keda paga formashon i bienestar di nan yunan. Despues di elekshonnan di sèptèmber lo sa si parlamentu ta bai di akuerdo ku e proposishon di lei.
Mark van Bommel ta sali for di selekshon Oraño.
Futbolista Mark van Bommel ta retirá for di selekshon Oraño. Di e manera ei e ke duna generashon nobo un chèns pa forma parti di e selekshon hulandes. Van Bommel a partisipá esaki. E ta bisa ku e ta keda na disposishon si treiner di e selekshon mester di dje. E kèpten di e ekipo a hunga entotal 79 wega den selekshon Oraño. Den próksimo temporada el lo hunga pa PSV.
Wer na Hulanda:
Solo ta bria na kosta pero den interior ta nublá. Temperatura ta 20 grado. Mañan ta poko mas kalor, pero mèrdia ta bira nublá i awa ta kai.