A aprobá proposishon enseñansa grátis

Ayera Konseho di Minister a bai di akuerdo ku e proposishon di enseñansa gratis di Pueblo Soberano. “Awe ta un dia históriko. E aña di skol binidero enseñansa lo ta gratis”, Carlos Monk, minister di Enseñansa, ta bisa hopi kontentu den un entrevista ku Telecuraçao.
Un di e puntonan di mas importante di e proposishon di awe ku a trata den Konseho di Minister, ta ku den e aña di skol binidero gobièrnu lo paga e kontribushon di buki i di mayor kasi kompletamente. Esaki ta konta pa tur skol di enseñansa di fundeshi i sekundario, sin tene kuenta ku entrada di e mayornan.
Mayornan ku a paga plaka di buki i di skol lo haña nan plaka bèk, pero ki dia i kon no ta kla ainda.
Artíkulo ku lo bira propiedat di e alumno no ta kompensá. Mester pensa riba ünifòrm, paña di trabou, kèts òf brel di seguridat.
Solushon struktural
Pa e añan di skol ku ta sigui lo bini un asina yamá ‘prima di skouder’. Pa determiná altura di esaki sí lo wak entrada di e mayornan. Ta kalkulá ku e prima aki lo mester generá 17.5 mion florin pa aña ku lo hasi finansamentu di enseñansa gratis strukturalmente posibel. Banda di esaki lo introdusí un impuesto tambe riba mandamentu di plaka pa estranhero. E impuesto aki mester trese entre 15 pa 20 mion èkstra pa por tene enseñansa gratis den futuro.
Buki i material
Pa loke ta e fondonan di buki di e diferente skolnan, a traha un plan amplio ku lo introdusí den fase. Ta bini un sistema kompletamente nobo kaminda lo duna e bukinan den préstamo pa usa. Lo mira tambe si por kambia pa e-books. Esaki lo spar hopi gastu.