Gritu di emergensia pa regla pa jetski i snòrkeldó

Na 2007 un koredó di jetski di 13 aña a pasa riba un snòrkeldó na bahia di Jan Thiel. E snòrkeldó tabata gravemente heridá. Poko tempu pasá korte a sentensia i a husga ku tantu e snòrkeldó komo e koredó di jetski mester a paga tinu mas mihó. No a indiká un hende kulpabel.
Aktualmente no ta eksistí legislashon i sufisiente regla kaminda ta determiná ‘reglanan di tráfiko’ entre e diferente gruponan di deportista di awa. Segun Curaçao Tourist Board (CTB) i e skolnan di buseo riba e isla ta bira tempu pa esaki kambia.
“Snòrkeldó por snòrkel tur kaminda den laman pero si nan ke bai ‘den blou skur’ nan mester hiba un bui pa nan ta mas visibel. Mester kontrolá jetski riba estilo di kore peligroso. Si nan ke yega tera nan mester kore den un liña règt i un pi’un pia.” Segun Roderick Gouverneur, bosero di wardakosta na Kòrsou esaki ta e úniko reglanan konosí pa snòrkeldó i jetski.
Hasi loke nos ta konsiderá prudente
“Tin hopi inklaridat”, Peter Bot, manager di skol di buseo Scuba Do na bahia di Jan Thiel ta bisa. E ta hür sèt di snòrkel ku turista. ”Komo skol di buseo nos ta mantené e regla ku e awa blou kla ta kaminda di landa i ku e parti blou skur ta pa boto. Si mi hür un sèt di snòrkel semper mi ta bisa ku ta mihó pa keda mas kantu di kosta posibel. Nunka mi no a mira regla ofishal di gobièrnu. Nos ta hasi loke ta parse nos prudente.”
Gattim Kabbara, CEO di CTB, ta haña ku ta masha nesesario pa tuma medida pa garantisá seguridat na playanan di Kòrsou. “E kantidat di turista riba e isla ta krese. Ta p’esei nos mester wak kos ku antes no tabatin atenshon p’e. Mas snòrkeldó mas tantu chèns di aksidente. Si nos ke sigui profilá komo lokashon di snòrkel i buseo ta apsolutamente nesesario pa tin lei kla.”
Aki tambe por tin legislashon
Otro kaminda na mundu sí tin legislashon kla kaminda a stipulá regla pa riba laman. Na Hulanda por ehèmpel Rijkswaterstaat pa kada parti di awa ta bisa ki tipo di boto por kore einan, unda i kon duru. “Aki tambe nos lo por hasi esaki masha bon”, Bot ta haña. “Reservá sierto bahia pa snòrkeldó i otro pa jetski. Si esaki ta muchu molèster aworaki por kuminsá di pone bui mandatorio pa snòrkeldó sa te kon leu nan por bai.”
Kabbara ta haña ku a bira tempu pa un kampaña di konsientisashon. “CTB ta haña seguridat di nos turistanan masha importante. Nan mester sa ku tin peliger ora bo drenta laman. Ma mester pone nos gobièrnu tambe na altura di esaki, pa hasi e kantidat di aksidente entre jetski i snòrkeldó mas abou posibel.