Enseñansa ta grátis pero kontribushon di mayor ta keda

Pa e aña eskolar benidero tantu buki di skol komo plaka di inskripshon lo ta 100% gratis. “Pa loke ta e asina yamá ‘kontribushon di mayor’ ku skolnan ta pidi, esaki ta keda algu boluntario”. Asina Leonard Coffi, direktor di e Organo di Ehekushon di Enseñansa i Siensia (UOW) a bisa den e edishon di Bon Informá di e siman aki.
Segun Melba Faneyte di Fundashon Claret pa Hustisia: “Mester bin kòntròl i sankshon riba skolnan ku ta obligá mayornan di paga kontribushon di mayor”. E fundashon ta boga tambe pa bini ku kòntròl rigoroso den direktivanan di skol riba uso di plakanan di supsidio.
No opstante e echo ku awor enseñansa ta gratis tumamentu di desishon lat tabatin su konsekuensianan. Un di nan ta ku mayornan mester pre-finansiá enseñansa gratis. Esaki ta trese hopi difikultat pa mayornan di menos rekurso.
Feffik
Desishon lat riba enseñansa gratis kombiná ku desishon di Feffik pa stòp ku areglo di pago ta perhudiká hobennan ku ke studia na Feffik. Esmeralda Daal, dosente na e skol di fishi aki ta relatá un situashon penoso di un hoben di 17 aña ku a kualifiká pero pa falta di sufisiente sèn no por a haña un lugá na e skol.
Buki
E echo ku skolnan di mesun nivel hopi biaha no ta usa e mesun tipo di buki ta perhudiká alumnonan ora nan tin ku kambia di skol. Esmeralda Daal: “Mester bai strukturá e bukinan ku ta drenta nos enseñansa”.