Organisashon nobo pa Karnaval 2013 ta konosí

Asosiashon Gruponan di Karnaval Kòrsou (AGKK), funshonarionan di Kas di Kultura i Stichting Overheidsaccountantsbureau (SOAB) lo organisá e fiesta di Karnaval binidero na Kòrsou, asina Stanley Ignacio, presidente di AGKK, ta bisa.
Segun Ignacio a tuma e desishon djárason den konseho di minister. “Siman pasá kaba mi a papia ku minister Monk pero awor e notisia ta ofishal. Nos ta masha kontentu.”
Punto di diskushon ku ta bini bèk tur aña
E temporada di karnaval ta kai trempan otro aña. E marcha di despedida ta tuma lugá riba 12 di febrüari 2012 kaba. “Ta p’esei ta importante pa palabrá tur kos na tempu”, Ignacio ta bisa. “Promé ku 15 di yüli tur desishon mester keda kla.”
Ignasio ta referí na e puntonan di diskushon ku ta bini bèk tur aña tokante ruta, muzik i finansamentu di e diferente gruponan. “Ta p’esei nos ta bai pa palabrashon konkreto pa e próksimo sinku añanan pa nos no tin nodi di hiba e mesun diskushon tur aña di nobo, manera ántes semper tabata e kaso.”
Reakshon impetuoso riba plan di reformashon
Último nuebe aña ta Fundashon pa Desaroyo di Karnaval (Fudeka) tabata organisá karnaval. Presidente Corinne Djaoen-Genaro aña pasá a presentá un plan di reformashon pa karnaval kaminda entre otro tabata bisa ku por a remplasá e bandanan den e marcha ku muzik live di loutspiker kant’i kaminda. Ademas e temporada di karnaval lo a dura dos na lugá di tres siman i a proponé un ruta nobo.
E reakshonnan riba e plan tabata impetuoso. Asosiashon di Músiko i Artista di Kòrsou (Amak) i AGKK a rechasá e proposishon di Fudeka kompletamente.
Ròl di konsehero pa Fudeka
Na mèi di e aña aki atrobe AGKK a ekspresá su malkontentu ku Fudeka i e manera ku e tabata regla e finansamentu. “E ora ei nos mes a bini ku un proposishon rònt di e organisashon di karnaval binidero”, Ignacio ta konta. “I esaki aparentemente tabatin sentido.”
Fudeka ta keda eksistí i lo tin un ròl komo konsehero. E organisashon di elekshon di Carnival Queen tambe lo keda de man de e organisashon ei.
Nada no ta konosí ainda
AGKK ta bai organisá karnaval ku SOAB i Kas di Kultura. Gibi Basilio, hefe di Kas di Kultura, no ta na altura di nada ainda. “Di parti di Kas di Kultura mi no por konfirma ku nos ta bai ko-organisá Karnaval”, e ta deklará. “Mi ta wardando telefon di minister.”
Minister Monk di Enseñansa, Siensia, Kultura i Deporte no tabata alkasabel pa komentario.