Arma no ta pa tur hende

“E petishon pa parlamentarionan karga arma no tin nada di haber ku defensa personal pero simplemente pa krea igualdat den nos sistema di trías politika”. Asina Ivar Asjes, presidente di Parlamentu ta splika den un komunikado di prensa. Pa eks-Promé Ministernan Miguel Pourier i Suzy Römer e motivashon aki no ta bálido. 
Segun Asjes, no ta trata aki di un kambio di lei pero di un adaptashon den ehekushon di e lei Ordenansa di Arma 1931 (P.B. 1967, no 168) pa medio di un dekreto gubernamental.
Presidente di parlamentu a manda e petishon aki pa Minister di Hustisia for di 27 di Aprel 2011 pero ta awor numa esaki a bira konosi pa públiko. Esaki a lanta un ola di krítika i frakshonnan di oposishon i te hasta di koalishon a distansiá nan mes for di e proposishon aki.
No ta promé bes
Na Yaüuari 1978 Leo Chance komo Minister-Presidente Interino di Antia Hulandes a firma un dekreto den kual ta pèrmiti funshonarionan haltu di tantu poder hudisial komo poder ehekutivo pa karga arma. Na Ougùstùs 1983 Don Martina komo Minister-Presidente tambe a firma un dekreto den kual ta pèrmiti ministernan keda ku nan arma pa un periodo di 4 aña despues ku nan baha komo minister.
Motivashon
Ni Miguel Pourier ni Suzy Römer no ta mira un motivashon bálido pa parlamentarionan karga un arma. Ambos a deklará ku nunka a hasi uso di e oportunidat pa karga un arma durante nan funshon komo Promé Minister pasobra e no ta nesesario ni tampoko sano. Den kaso mes ku un mandatario mester di protekshon semper bai por hasi uso di polis i otro organisashonnan di seguridat.
Suzy Römer: “uso di arma mester ta funshonal i no tin nada di haber ku igualdat den nos trías politika. Pues kargamentu di arma mester ta mará na un sierto funshon ku berdaderamente ta rekerí di esaki manera polis, fiskalnan i wesnan”.
Miguel Pourier: “Ministernan no tin nesesidat pa karga arma i parlamentarionan muchu menos. Armamentu di parlamentarionan ta sumamente peligroso pasobra e ta afektá e diskushon demokrátiko den Parlamentu. Banda di esaki e ta krea un situashon di intimidashon i ta duna un mal señal na komunidat”.
Igualdat
Pa Ivar Asjes e prinsipio di igualdat den nos trias politika i deseo di pueblo ta hopi importante i pesei mes ta pone su orea na kurason di e pueblo. “Si pueblo deseá esaki, mi ta dispuesto na adaptá mi petishon den unu kaminda enbes di otorgá parlamentarionan pèrmit pa arma, ta kita e pèrmit for di e.o. gobernadó, ministernan, wesnan, prokuradó general, abogado general i fiskalnan”.