‘Maneho di supsidio di fundashonnan di gobièrnu ta un desaster’

Ounke minister Carlos Monk di Enseñansa, Siensia i Deporte a primintí ku e luna aki lo paga salario dia 27 di yüni esaki no a sosodé. Awe trahadonan di Sentro Deportivo Kòrsou (SDK) huntu ku Abvo a bai Konseho di Minister pa reklamá.
Stanley Heerenveen di sindikato Abvo: “Mes ora un telefon di Monk a drenta, kaminda awó sí el a sigurá nos ku djaweps ta depositá e plaka. Nos ta dun’é benefisio di duda i nos lo warda un dia mas.”Heerenveen a bisa ku mester bini un solushon struktural pa e maneho di supsidio di gobièrnu ku ta fayando. “”Ta bira di mas ku tur luna nos mester pone trabou abou pa un simpel pago di salario.”
Awor si a kaba
E maneho di supsidio di fundashon di gobièrnu ta laga hopi di deseá, Heerenveen ta haña. Kada luna atrobe e fundashonnan ta risibí nan plaka di supsidio muchu lat i asina no por paga salario di e trahadónan E bònt ta haña ku awor si a kaba.
Siman pasá trahadónan di SDK a pone trabou abou pasobra no a paga nan salario. Asta nan plaka di fakansi di luna di mei no a paga ainda.
No ta SDK so a hañ’é den problema finansiero pa motibu di pago lat di plaka di supsidio. Otro fundashon, manera Fundashon pa Stimulá Edukashon i Formashon den Bario (FSEFB) den pasado no por a paga su trahadónan i Fundashon Sentro pa Guia Edukashonal i Fundashon Desaroyo i Progreso tampoko.
No ta salario haltu
Agnes Gooding, trahadó atministrativo na FSEFB ta konfirmá ku tur fin di luna e ta den suspenso si lo depositá e plaka riba su kuenta na tempu. “E situashon aki ta masha fèrfelu pasobra no ta trata di salario haltu. Fin di luna hende mester di nan sèn.”
Bankonan no ta tene kuenta ku ta paga salario lat. Si no por transferí plaka na tempu, banko ta kita un suma fiho komo but. Segun Stanley Heerenveen asina e trahadó ta pèrdè basta plaka. “E trahadónan no por ta víktima tur fin di luna di mal maneho di banda di gobièrnu òf di direktiva di fundashon ku no tin nan asuntunan finansiero na òrdu.”
Bon gobernashon
Hopi biaha e direktivanan di fundashonnan tampoko no ta manehá nan finansanan bon. Awo kur ta fókùs riba e eksigensha di bon gobernashon e fundashonnan mester entregá nan kuenta anual na tempu. Ma esaki no ta e kaso tur ora, Heerenveen ta bisa. “Esaki ta inaseptabel i mi ta haña bon ku gobièrnu ta subi e preshon. Ma no por t’asina ku si direktivanan di fundashonnan ta hiba un mal maneho finansiero, ta e trahadónan ta sinti esaki den nan pòtmòni.”